కేరళ మెగాస్టార్ నటన గురించి ఆయన ఎంచుకునే కథలు, చేసే సినిమాల గురించి ప్రత్యేకంగా చెప్పాల్సిన పని లేదు. మమ్ముట్టి నటనకు తెలుగులోనూ అభిమానులున్నారు. ఆయన నేరుగా నటించిన తెలుగు చిత్రాలు ఇప్పటికీ ఎప్పటికీ అలా నిలిచిపోతాయి. అలాంటి మమ్ముట్టి హీరోగా వచ్చిన పొలిటికల్ డ్రామా వన్ సినిమా ఇప్పుడు డబ్బింగ్ రూపంలో తెలుగు ప్రేక్షకుల ముందుకు వచ్చింది. నేడు (జూలై 30) ఆహాలో విడుదలైన ఈ మూవీ ఎలా ఉందో ఓ సారి చూద్దాం. తెలంగాణ రాష్ట్రానికి సీఎంగా కల్లూరి చంద్రం పాత్రలో మమ్ముట్టి కనిపిస్తారు. రాజకీయాల్లో సమూల ప్రక్షాళన తీసుకురావాలని ప్రయత్నిస్తుంటారు. అలా సీఎంకు వ్యతిరేకంగా ఓ యువకుడు సంజయ్ (మాథ్యూ థామస్) ఓ పోస్ట్ పెడతాడు. ముఖ్యమంత్రికి ఉండే ప్రోటోకాల్ వల్ల సంజయ్ ఇబ్బందులు ఎదుర్కొంటాడు. అలా ముఖ్యమంత్రి మీద, ప్రభుత్వం మీద ఫేక్ ఐడీతో విమర్శలు చేస్తాడు. దీన్ని ఆధారంగా చేసుకుని విపక్ష నాయకుడు జయానంద్ (మురళీ గోపీ) రాస్తాలు, సమ్మెలు, స్ట్రైక్‌లు చేస్తుంటాడు. ఇక ప్రజాప్రతినిధుల పనితీరుపై ప్రజలకు అసంతృప్తి ఉంటే వారి కాలపరమితి తీరక ముందే వారిని రీ కాల్ చేసే బిల్లు కోసం కల్లూరి చంద్రం ప్రయత్నిస్తాడు. ఈ క్రమంలో కల్లూరి చంద్రంకు ఎదురైన పరిస్థితులు ఏంటి? కల్లూరి చంద్రం స్నేహితుడు, పార్టీ ప్రెసిడెంట్ అయిన బాబీ(జోజు జార్జ్) చివరకు ఏం చేస్తాడు? తనకు వ్యతిరేకంగా పోస్ట్ పెట్టిన సంజయ్ కథ ఏమవుతుంది? ఇలాంటి ప్రశ్నలకు సమాధానమే వన్. కల్లూరి చంద్రం పాత్రలో మమ్ముట్టి తన అనుభవాన్ని చూపించారు. సీఎం పాత్రలో ఎంతో హుందాగా కనిపించారు. నీతి, నిజాయితీకి నిలువుటద్దంలా నటించారు. ప్రజలకు కష్టాలు వస్తే క్షణంలో స్పందించే మనసున్న నేతగా నటించారు. అలా ఈ క్యారెక్టర్‌లో మమ్ముట్టి అందరినీ మెప్పిస్తారు. స్నేహితుడికి అండగా ఉంటూనే, పార్టీ అధ్యక్షుడిగా తాను పడే మథనాన్ని బాబి పాత్రలో జోజు జార్జ్ అద్భుతంగా చూపించారు. ఇక సాధారణ కుటుంబం, మధ్యతరగతి యువకుడిగా సంజయ్ చక్కగా నటించాడు. ప్రతిపక్ష నాయకుడిగా జయానంద్ క్యారెక్టర్‌లో మురళీ గోపీ సరిగ్గా సరిపోయారు. మిగిలిన పాత్రల్లో అందరూ చక్కగా నటించారు. పొలిటికల్ డ్రామాను సినిమా నేపథ్యంగా ఎంచుకున్నప్పుడు ఒక మొనాటినీ వస్తుంది. మంచి పనులు చేద్దామని ప్రయత్నించడం, వాటిని విపక్షాలు చేయకుండా అడ్డుపడటం, ప్రజా పరిపాలను మార్చేద్దామని చూడటం, మార్పులు తీసుకురావాలని ప్రయత్నించడం వంటివి ఉంటాయి. వాటిని స్వపక్షం, విపక్షం రెండూ కూడా వ్యతిరేకిస్తుంటుంది. అలా రాజకీయపుటెత్తుగడల మధ్య కథనం నడుస్తూ ఉంటుంది. ఇందులోనూ అదే కనిపిస్తుంది. సినిమాల్లో జరిగినట్టుగా బయట జరగాలని, ప్రజా ప్రతినిధి, ఓ సీఎం అలా ఉండాలని ఆశించలేం. సమస్య చెప్పగానే స్పందించడం, సామాన్య ప్రజానీకం కోసం సీఎం రోడ్డెక్కడం వంటి సీన్లు చూడటానికి బాగానే ఉన్నా.. వాస్తవికతకు ఎంతో దూరంలో ఉన్నట్టు అనిపిస్తుంది. ఈ కథ మొత్తం కూడా రైట్ టు రీకాల్ చట్టం గురించి తిరుగుతుంది. ఎన్నికైన ఎమ్మెల్యేల పనితీరు నచ్చక పోతే మధ్యలోనే పదవి నుంచి తీసేసే అధికారం ప్రజలకు ఉండాలని, ఆ చట్టం చేయాలని, దాని ఆవశ్యకతను చెప్పేందుకు వన్ మూవీని దర్శకుడు వాడుకున్నట్టు కనిపిస్తోంది. అయితే ఇది వాస్తవంగా జరగదు. కానీ సినిమాలో మాత్రం పాజిటివ్ ఎండ్ ఇచ్చి.. ప్రేక్షకులను మెప్పించే ప్రయత్నం చేశాడు దర్శకుడు. వన్ విషయంలో ముఖ్యంగా నేపథ్య సంగీతం ఎక్కువ ప్రభావితం చూపిస్తుంది. సీఎం ఎంట్రీ, ఆయన వ్యక్తిత్వాన్ని చూపేందుకు కొట్టిన బ్యాక్ గ్రౌండ్ స్కోర్ అందరినీ మెప్పిస్తుంది. కొన్ని సీన్లు రొటీన్ అనిపించేలా ఉంటాయి. వాటికి కత్తెరపడితే బాగుండేది. సినిమాటోగ్రఫీ బాగుంది. మాటలు కూడా ఆలోచనలు రేకెత్తించేలా ఉంటాయి. నిర్మాణ విలువలు సినిమా స్థాయికి తగ్గట్టుగా ఉన్నాయి. చివరగా : వన్.. నిజంగానే మమ్ముట్టిన నటనలో నెంబర్ వన్
from Telugu Movie News | Movie News in Telugu | Movie Gossips in Telugu https://ift.tt/3yiaKyS
v
