దేవుడ్నే నమ్మని కత్తి మహేష్‌కి.. గంటన్నర దేవుని సువార్త.. వైరల్‌ వీడియో

ఫేమస్ మూవీ క్రిటిక్.. నటుడు.. రాజకీయ విశ్లేషకుడు మరణించడంతో ఆయన స్వగ్రామం చిత్తూరు జిల్లా యర్రావారిపాలెం మండలంలోని యలమందలో నేడు (జూలై 12) అంత్యక్రియలు నిర్వహించారు. హిందూసాంప్రదాయ పద్దతిలో అంతిమసంస్కారాలు నిర్వహించగా.. కత్తి మహేష్ అభిమానులు.. కుటుంబ సభ్యులు.. ఆయన సన్నిహితులు అంతిమయాత్రలో పాల్గొన్నారు. ఇదిలాఉంటే.. కత్తి మహేష్ బతికి ఉండగా దేవుడే లేడని వాదించి.. అనేక సందర్భాల్లో వివాదాస్పద వ్యాఖ్యలు చేసిన విషయం తెలిసిందే. దీంతో ఆయన చాలామందికి శత్రువు అయ్యారు. కొంతమంది అయితే కత్తి మహేష్ చావుని కూడా సెలబ్రేట్ చేసుకుంటూ సోషల్ మీడియాలో దారుణమైన పోస్ట్‌లు పెడుతున్నారు. ఇదిలాఉంటే.. దేవుడ్నే నమ్మని కత్తి మహేష్‌కి గంటన్నర సువార్త ప్రకటించానంటూ ఆయనతో జరిపిన సంభాషణ గురించి తెలియజేశారు ప్రముఖ అంతర్జాతీయ సువార్తీకులు జాన్ వెస్లీ. ప్రస్తుతం ఈ వీడియో సోషల్ మీడియాలో వైరల్ అవుతోంది. కత్తి మహేష్ రాజమండ్రి వచ్చినప్పుడు తమని కలిశారని తెలియజేసిన జాన్ వెస్లీ.. ‘కత్తి మహేష్ ఎవరో మాకు పెద్దగా తెలియదు.. అప్పుడప్పుడు టీవీ డిబేట్‌లలో మాత్రమే చూశాను. అయితే ఓ స్నేహితుడి ద్వారా కత్తి మహేష్ పరిచయం అయ్యారు. ఆయన రాజమండ్రి వచ్చినప్పుడు మమ్మల్ని కలిశారు. ఆ టైంలో కత్తి మహేష్ దేవుడు గురించి మాట్లాడుతూ.. దేవుడు అనే ఒక శక్తి అయితే ఉంది కానీ.. దానికి ఒక్కొక్కరూ ఒక్కోపేరు పెట్టేసుకుంటున్నారు. నాకు ఇదంతా నమ్మశక్యంగా అనిపించడం లేదు అని కత్తి మహేష్ అన్నారు. ఆయన ఆ మాట చెప్పగానే సుమారు గంటన్నర దేవుని సువార్త చెప్పడం ప్రారంభించాం.. సుమారు గంటన్నర పాటు సువార్త ప్రకటించిన తరువాత.. ఆయన మాకు షేక్ హ్యాండ్ ఇచ్చి.. అర్ధవంతమైన మాటలు చెప్పినందుకు థాంక్స్ అని అన్నారు. ఆ తరువాత ఆయన్ని మళ్లీ ఎప్పుడూ కలవలేదు’ అని కత్తి మహేష్ గురించి తన ప్రసంగంలో ఆసక్తికరమైన విషయాలు తెలియజేశారు జాన్ వెస్లీ.

from Telugu Movie News | Movie News in Telugu | Movie Gossips in Telugu https://ift.tt/3AW1xxV
v