కరోనాపై ఫైట్: మెగాస్టార్ కీలక నిర్ణయం.. కేసీఆర్‌కు అండగా!

కొరటాల శివ దర్శకత్వంలో రూపొందిస్తున్న తన సినిమా ‘ఆచార్య’ చిత్రీకరణను తక్షణం వాయిదా వేస్తున్నట్లు మెగాస్టార్ ప్రకటించారు. వ్యాప్తి చెందకుండా కేసీఆర్ ప్రభుత్వం తీసుకుంటున్న చర్యలకు తోడుగా ప్రజా సహకారం కూడా అవసరం అని ఆయన పిలుపునిచ్చారు. కరోనా నియంత్రణ దిశగా ఏపీ ప్రభుత్వం కూడా చర్యలు తీసుకుంటోంది.. మరింత అప్రమత్తత అవసరమని పేర్కొన్నారు. కరోనా వైరస్‌ను నియంత్రించే ఉద్యమంలో సినీ రంగం కూడా పాలు పంచుకోవాలని కోరారు. అందరూ సహకరిస్తారని ఆశిస్తున్నట్లు తెలిపారు. ఆర్థికంగా కొంత ఇబ్బంది కలిగే అవకాశం ఉన్నప్పటికీ.. ఆరోగ్యాన్ని మించింది మరొకటి లేదు కాబట్టి ఇది తప్పదని వివరించారు. కరోనా సోకిన వారికి తగిన చికిత్స అందిస్తూనే.. వైరస్ వ్యాప్తి చెందకుండా, జనాలు గుమికూడకుండా పలు నిర్ణయాలు తీసుకోవడాన్ని మెగాస్టార్ ఆహ్వానించారు. క్రీడలను వాయిదా వేయడం, మాల్స్, సినిమా హాల్స్‌ని మూసివేయడం, స్కూల్స్, కళాశాలలకు సెలవులు ప్రకటించడం తదితర చర్యలు తీసుకోవడం ముదావహం అని ఆయన పేర్కొన్నారు. కరోనా మహమ్మారి నియంత్రణకు కేంద్ర, రాష్ట్ర ప్రభుత్వాలు ద్విముఖ వ్యూహాన్ని అవలంభిస్తోన్నాయని చిరంజీవి గుర్తు చేశారు. ‘కరోనా నియంత్రణ బాధ్యతను ప్రభుత్వాలకే వదిలేయకుండా అందరూ భాగస్వామ్యులు కావాలి. అందరిలో చైతన్యం కలిగించాలని ప్రతి ఒక్కరినీ కోరుతున్నాను’ అని చిరంజీవి పేర్కొన్నారు. ఈ మేరకు శనివారం (మార్చి 14) ఆయన ఓ ప్రకటన విడుదల చేశారు. ‘తెలంగాణ ముఖ్యమంత్రి కేసీఆర్ గారు అందరిలో ధైర్యాన్ని, నమ్మకాన్ని పెంచే విధంగా చర్యలు తీస్కుంటున్నందుకు ధన్యవాదాలు. ఆంధ్రప్రదేశ్ ప్రభుత్వం, ముఖ్యమంత్రి వైఎస్ జగన్ మోహన్ రెడ్డి గారు కూడా కొన్ని ముందస్తు నివారణా చర్యలు ప్రారంభించినట్టు తెలుసుకున్నా. పరిస్థితులకు అనుగుణంగా తగిన నిర్ణయాలు తీసుకుంటారని భావిస్తున్నా’ అని చిరంజీవి పేర్కొన్నారు. సినిమా షూటింగులలో కూడా పెద్ద సంఖ్యలో సాంకేతిక నిపుణులు పాల్గొంటారని చిరంజీవి గుర్తు చేశారు. వారి ఆరోగ్యాన్ని దృష్టిలో ఉంచుకుని 10 నుంచి 15 రోజుల పాటు షూటింగ్స్ వాయిదా వేస్తే బాగుంటుందని భావిస్తున్నట్లు ఆయన అభిప్రాయం వ్యక్తం చేశారు. ప్రస్తుతం చిత్రీకరణ కొనసాగుతున్న తన సినిమా షూటింగ్‌ని వాయిదా వేద్దామని దర్శకుడు కొరటాల శివతో చెప్పినప్పుడు.. ఆయన వెంటనే దానికి అంగీకరించారని మెగాస్టార్ తెలిపారు. Also Read: Don't Miss:

from Telugu Movie News | Movie News in Telugu | Movie Gossips in Telugu https://ift.tt/38PAwNj
v