మీ పిల్లలకు ఏమైనా మంచి చేయాలనుకుంటే అది ఇదే.. జీవన విధానంపై పూరి జగన్నాథ్ ఓపెన్ కామెంట్స్

గత కొన్ని రోజులుగా పోడ్ కాస్ట్ ఆడియోలతో పలు విషయాలపై స్పందిస్తున్న డాషింగ్ డైరెక్టర్ తాజాగా ‘లివింగ్‌ ఆఫ్‌ ది గ్రిడ్‌’ అంటూ ఓ సందేశమిచ్చారు. అప్పులు లేని జీవితం. జీవితాంతం ప్రతినెలా ఎవ్వరికీ బిల్లులు కట్టాల్సిన అవసరం లేదు అనే కాన్సెప్ట్‌పై వివరణ ఇచ్చారు. ''ఆఫ్‌ ది గ్రిడ్‌ లివింగ్’‌.. నాగరిక ప్రపంచానికి దూరంగా ఎక్కడో ఎలాంటి సదుపాయాలు లేకుండా బతకడం. ‘లివింగ్‌ ఆఫ్‌ ది గ్రిడ్‌’ అంటే మంచినీళ్లు‌, కరెంటు, గ్యాస్‌, ఇంటర్నెట్‌.. ఈ విధమైన రకాలైన మౌలిక వసతులు లేకుండా జీవించడం. గోయింగ్‌ ఆఫ్‌ ది గ్రిడ్‌ అనేది కొంతమందే చేయగలరు. అలా చేయాలంటే సరైన ప్రదేశాన్ని చూసుకుని ముందు ఇల్లు కట్టుకోవాలి. అలా చేయాలంటే సోలార్‌ లాంటి పవర్‌ సోర్సులు పెట్టుకోవాలి. కుదిరితే వర్షం నీటిని సైతం ఉపయోగించుకునేలా చూసుకోవాలి. వీళ్ళు కమ్యూనికేషన్‌ కోసం శాటిలైట్‌ ఫోన్‌ దగ్గర ఉంచుకుంటారు. వాళ్ల ఆహారాన్ని వాళ్లే పండించుకుంటారు. పశువులు, కోళ్లను పెంచుకుంటారు. పశువుల పేడతో గోబర్‌ గ్యాస్‌ తయారు చేస్తారు. దాన్నే పంటలకు ఎరువుగా కూడా వాడతారు. వాళ్లకి కరెన్సీతో పనిలేదు. అప్పులు లేని జీవితం. జీవితాంతం ప్రతినెలా ఎవ్వరికీ బిల్లులు కట్టాల్సిన అవసరం లేదు. అప్పులవాళ్లు వచ్చి వాళ్ల ఇంటి తలుపులు కొట్టరు. ఎలాంటి నోటీసులు వాళ్ల ఇంటికి రావు. ప్రపంచంలో 35మిలియన్ల మంది ఇలా ‘ఆఫ్‌ ది గ్రిడ్‌’ జీవితం కొనసాగిస్తున్నారు. పర్యావరణం పట్ల వీళ్లు ఎంతో బాధ్యతగా ఉంటారు. ఆరోగ్యంగా, సంతోషంగా ఉంటారు. మన పూర్వీకులు ఇలాగే ఎన్నో వేల సంవత్సరాలు బతికారు. వీళ్లు సైతం ఆనాటి పూర్వీకుల జీవనశైలిని ఫాలో అవుతుంటారు. అప్పట్లో అందరిదీ ‘ఆఫ్‌ గ్రిడ్‌ లివింగే’ కాబట్టే మన భూమి ఎంతో పచ్చగా ఉండేది. 100 డైనోసార్లు అడవిలో పుట్టి అదే అడవిలో చనిపోతే ఈ ప్రకృతికి కూడా గుర్తు ఉండదు. కానీ నలుగురు మానవులు బతికి చనిపోయిన తర్వాత చూస్తే అడవి సగం నరికేసి ఉంటుంది. అందుకే ప్రకృతి మనల్ని గుర్తు పెట్టుకుంటుంది. మనకి ప్రకృతిలో బతకడం రాదు. ఆఫ్‌ గ్రీడ్‌గా జీవించేవాళ్లు ఈ ప్రకృతికి ఎంతో అవసరం. ఈ వైరస్‌ల నుంచి దూరంగా హాప్పీగా బతకాలంటే ఇలాంటిది మనకి కావాలి. పట్టణాలకు దూరంగా ఇలాంటి ఒక ఇంటిని నిర్మించుకోవాలి. ఎందుకంటే మన భవిష్యత్తు ఇంకా దారుణంగా ఉండనుంది. మీ పిల్లలకు ఏమైనా మంచి చేయాలనుకుంటే అది ఇదే. దగ్గరలో ఆస్పత్రి లేకపోతే ఎలా అని భయపడొద్దు. అక్కడ రోజూ పనిచేసుకుంటూ బతికితే మీకు ఎలాంటి జబ్బులు ఉండవు. పోతే వృద్ధాప్యంతోనే పోతారు. నీటిలో చేపల్లాగా, గాలిలో పక్షుల్లాగా, అడవిలో జంతువుల్లాగా.. ప్రపంచంతో సంబంధం లేకుండా ఫ్రీగా హాయిగా బతికే మార్గం ఆఫ్‌ ది గ్రిడ్‌. వెనక్కెళ్లి బతుకుదాం. ముందుకెళ్లి పీకేది ఏమీ లేదు'' అన్నారు పూరి జగన్నాథ్.

from Telugu Movie News | Movie News in Telugu | Movie Gossips in Telugu https://ift.tt/3w6DMQd
v