సినీ కార్మికులకు మరోసారి అండగా నిలిచిన చిరంజీవి.. ఈసారి కోవిడ్ టీకాల విషయంలో

వైరస్ వ్యాప్తి నేపథ్యంలో గత ఏడాది కేంద్రం విధించిన లాక్‌డౌన్ కారణంగా షూటింగ్స్ ఆగిపోయి జీవనోపాధి లేక ఆర్థిక ఇబ్బందుల్లో ఉన్న రోజువారీ వేతన కార్మికుల కోసం సారథ్యంలో క‌రోనా క్రైసిస్ చారిటీ (సీసీసీ)ని ప్రారంభించిన విషయం తెలిసిందే. ఈ ట్రస్ట్ ద్వారా సినీ ప్రముఖుల నుంచి విరాళాలు సేకరించి పెద్ద ఎత్తున సినీకార్మికుల‌ను ఆదుకున్నారు. లాక్‌డౌన్ కఠినంగా అమలైన రోజుల్లో నెలరోజులకు సరిపడే సరుకులను సినీ కార్మికులకు ఇంటి వద్దకే అందించారు. తెలుగు సినిమా పరిశ్రమ చేపట్టిన ఈ కార్యక్రమం పట్ల సర్వత్రా హర్షం వ్యక్తమైంది. ఆ తర్వాత లాక్‌డౌన్ నిబంధనలను సడలించినప్పటికీ.. ఇబ్బందులు ఎదురుకుంటున్న సినీ కార్మికులకు ఈ ట్రస్ట్ సహాయం చేసింది. షూటింగ్‌లు పూర్తిస్థాయిలు ప్రారంభమై.. సరైనా ఉపాధి దొరికే వరకూ అవసరమైన చేయూతను అందించింది. మరోవైపు శాస్త్రవేత్తల కృషితో కోవిడ్ టీకా అందుబాటులోకి రావడంతో అందరికి కాస్త ఉపశమనం కలిగింది. భారతదేశంలో ఈ టీకా వినియోగం విస్తృతంగా జరుగుతోంది. ఈ నేపథ్యంలో మెగాస్టార్ మరోసారి తన ఉదారతని చాటుకున్నారు. సీసీసీ తరఫున సినీ కార్మికులకు ఉచితంగా టీకా అందించాలని నిర్ణయం తీసుకున్నట్లు ఆయన ప్రకటించారు. కింగ్ అక్కినేని నాగార్జున నటించిన ‘వైల్డ్ డాగ్’ చిత్రం ప్రెస్‌మీట్‌లో ఆయన పాల్గొన్నరు. ఈ సమావేశంలో చిరు ఈ ప్రకటన చేశారు. ‘గత ఏడాది కరోనా వైరస్ సృష్టించిన క్లిష్ట పరిస్థితుల్లో సీసీసీని ఏర్పాటు చేశాము. దీని ద్వారా సేకరించిన విరాళాలతో ఎంతో మందికి సహాయం చేశాము. అందులో కొంత మొత్తం నగదు మిగిలి ఉంది. ఆ నగదుతో సినీ కార్మికులకు, వారి కుటుంబాలకు వ్యాక్సిన్ ఇప్పించాలనే ఆలోచన వచ్చింది’’ అని ఆయన ప్రకటించారు. ఇక ఈ ప్రెస్‌మీట్‌లో చిరు ‘వైల్డ్‌ డాగ్’ చిత్రంపై ప్రశంసల వర్షం కురిపించారు. ప్రతీ ఒక్కరు తప్పకుండా చూడాల్సిన సినిమా ఇది అని ఆయన కొనియాడారు. ఇలాంటి అద్భుతమైన చిత్రాన్ని తెరకెక్కించిన దర్శక, నిర్మాతలను ప్రత్యేకంగా అభినందించిన మెగాస్టార్.. ఇలాంటి సినిమాలు తెలుగు ఇండస్ట్రీలో మరిన్ని రావాలని ఆకాంక్షిస్తున్నానని తెలిపారు.

from Telugu Movie News | Movie News in Telugu | Movie Gossips in Telugu https://ift.tt/3fHs2Pi
v