‘సత్యమేవ జయతే’ సాంగ్‌పై మీమ్స్‌‌.. వకీల్ సాబ్ చూశాక మాట్లాడుకుందాం.. రామజోగయ్య శాస్త్రి కౌంటర్

జన జన జన.. జనగణమున కలగలిసిన జనం మనిషిరా.. మన మన మన.. మన తరపున నిలబడగల నిజం మనిషిరా.. నిశి ముసిరిన కలలను తన వెలుగుతో గెలిపించు ఘనుడురా.. పడి నలిగిన బతుకులకొక బలమగు భుజమివ్వగలడురా.. సత్యమేవ జయతే.. సత్యమేవ జయతే.. వకీల్ సాబ్ చిత్రంలోని ‘సత్యమేవ జయతే’ సాంగ్ లిరిక్స్ జనసేన అధినేత పవన్ కళ్యాణ్ నిజ జీవితానికి దగ్గరగానే ఉంది. పవన్ కళ్యాణ్‌ని ఎంతో ఇష్టపడే ప్రముఖ రచయిత రామజోగయ్య శాస్త్రి ఈ సాంగ్ రాయగా.. శంకర్‌ మహాదేవన్‌తో కలిసి పృథ్వీచంద్ర, థమన్‌ ఈ పాటను ఆలపించారు. థమన్ అదిరిపోయే ట్యూన్స్ ఇవ్వడంతో ఈ పాట సోషల్ మీడియాలో సంచలనంగా మారింది. మిలియన్ల వ్యూస్ కొల్లగొడుతోంది. ఇదిలా ఉంటే.. పవన్ కళ్యాణ్ సినిమాల నుంచి పొలిటికల్ టర్న్ తీసుకున్న తరువాత చాలామంది టార్గెట్ అయ్యారు. రాజకీయ విమర్శలతో పాటు ఆయన సినిమాలపై విమర్శల దాడి పెరిగింది. తాజాగా వకీల్ సాబ్ సినిమా విషయంలో చాలా మీమ్స్ వస్తున్న విషయం తెలిసిందే. ఇక సత్యమేవ జయతే సాంగ్‌పై కూడా ట్రోల్స్ వస్తున్నాయి. ముఖ్యంగా పాట రాసిన రామజోగయ్య శాస్త్రిపై జోక్‌లు వేస్తూ మీమ్స్ క్రియేట్ చేస్తున్నారు. ‘వకీల్ సాబ్ గురించి పాట రాయమంటే.. పవన్ కళ్యాణ్ గురించి పాట రాశారేంటి? అంటూ మీమ్స్ కోసం బ్రహ్మానందాన్ని రంగంలోకి దించడంతో ప్రస్తుతం ఈ మీమ్స్ వైరల్ అవుతున్నాయి. అయితే ఈ మీమ్స్‌పై రచయిత రామ జోగయ్య శాస్త్రి ట్విట్టర్ ద్వారా స్పందించారు. తనను ట్యాగ్ చేస్తూ మీమ్స్ క్రియేట్ చేసిన వారికి కౌంటర్ ఇస్తూ.. ‘సినిమా చూశాక మాట్లాడుకుందాం.. సరేనా’? అంటూ సీరియస్‌గా రియాక్ట్ అయ్యారు. ఇదిలాఉంటే.. 'వ‌కీల్‌సాబ్‌' ఏప్రిల్ 9న ప్ర‌పంచ వ్యాప్తంగా భారీ విడుదలకు రెడీ అయ్యింది. ప్ర‌ముఖ నిర్మాత బోనీ క‌పూర్ స‌మ‌ర్ప‌ణ‌లో శ్రీ వెంక‌టేశ్వ‌ర క్రియేష‌న్స్‌, బే వ్యూ ప్రాజెక్ట్స్ ప‌తాకాల‌పై దిల్‌రాజు, శిరీష్ ఈ చిత్రాన్ని నిర్మిస్తున్నారు. శ్రీరామ్ వేణు ద‌ర్శ‌కుడు.

from Telugu Movie News | Movie News in Telugu | Movie Gossips in Telugu https://ift.tt/3rhYbQz
v