ఎస్పీ బాలుకి పద్మ విభూషణ్.. మూడు ‘పద్మ’లు అందుకున్న రెండో దక్షిణాది గాయకుడు

దిగ్గజ గాయకుడు, గానగంధర్వుడు దివంగత ఎస్పీ బాలసుబ్రహ్మణ్యంను భారత ప్రభుత్వం పద్మ విభూషణ్‌ పురస్కారంతో గౌరవించింది. మరణానంతరం ఆయనకు ఈ పురస్కారాన్ని ప్రకటించింది. ఈ మేరకు గణతంత్ర దినోత్సవాన్ని పురస్కరించుకుని ప్రతిష్టాత్మక ‘పద్మ’ అవార్డుల జాబితాను సోమవారం కేంద్ర ప్రభుత్వం విడుదల చేసింది. 2021 సంవత్సరానికి గాను ఏడుగురికి పద్మవిభూషణ్‌, 10 మందికి పద్మభూషణ్‌, 102 మందికి పద్మశ్రీ పురస్కారాలు ప్రకటించింది. ఈ జాబితాలో తెలుగు సినీ పరిశ్రమ నుంచి (పద్మ విభూషణ్), ప్రముఖ గాయని చిత్ర (పద్మ భూషణ్), మరో ప్రముఖ గాయని బోంబే జయశ్రీ (పద్మశ్రీ) ఉన్నారు. కళారంగంలో వీరికి పద్మ అవార్డులను కేంద్రం ప్రకటించింది. ఎస్పీ బాలసుబ్రహ్మణ్యం ఇప్పటికే పద్మశ్రీ, పద్మ భూషణ్ అవార్డులను అందుకున్నారు. ఇప్పుడు రెండో అత్యుత్తమ పౌర పురస్కారం అయిన పద్మ విభూషణ్ ఆయన్ని వరించింది. దీంతో మూడు పద్మ పురస్కారాలను ఆయన అందుకున్నట్టయింది. దక్షిణాది నుంచి ప్రముఖ గాయకుడు కె.జె.ఏసుదాసు తరవాత మూడు పద్మ అవార్డులను అందుకున్న కళాకారుడు ఎస్పీ బాలసుబ్రహ్మణ్యం. ఏసుదాసు 1975లో పద్మశ్రీ, 2002లో పద్మ భూషణ్, 2017లో పద్మ విభూషణ్ పురస్కారాలను అందుకున్నారు. ఇక బాలు.. 2001లో పద్మశ్రీ, 2011లో పద్మ భూషణ్ అందుకోగా ఇప్పుడు 2021లో మరణానంతరం పద్మ విభూషణ్ వరించింది. ఈ మూడు పద్మ అవార్డులకు ఎస్పీ బాలసుబ్రహ్మణ్యం పేరును తమిళనాడు ప్రభుత్వం నామినేట్ చేసింది. ఇదిలా ఉంటే, ప్రముఖ గాయని చిత్ర 2005లో పద్మశ్రీ అందుకున్నారు. మళ్లీ 16 ఏళ్ల తరవాత ఇప్పుడు పద్మ భూషణ్ అందుకుంటున్నారు. మొత్తానికి టాలీవుడ్‌తో సంబంధం ఉన్న ముగ్గురు ప్రముఖ గాయనీగాయకులు ఈ ఏడాది పద్మ అవార్డులకు ఎంపికయ్యారు. ఐదు దశాబ్దాల పాటు తెలుగు, తమిళ చిత్రసీమల్లో తన స్వరంతో అద్భుతం చేసిన ఎస్పీ బాలసుబ్రహ్మణ్యం ఉత్తమ గాయకుడిగా ఆరుసార్లు జాతీయ చలనచిత్ర పురస్కారాలను గెలుచుకున్నారు. అలాగే 25 నంది అవార్డులు ఆయన్ని వరించాయి. 16 భాషల్లో 40వేలకు పైగా పాటలు పాడి గిన్నిస్ బుక్ ఆఫ్ రికార్డుల్లో స్థానం సంపాదించారు. దక్షిణాదిలో గొప్ప గాయకుడిగా అందరి మనసుల్లో స్థానం పొందిన ఎస్పీ బాలు గతేడాది సెప్టెంబర్ 25న కన్నుమూశారు.

from Telugu Movie News | Movie News in Telugu | Movie Gossips in Telugu https://ift.tt/2KLAn7w
v