సున్నితమైన ప్రేమకథల్ని తెరపై అందంగా ఆవిష్కరించే దర్శకుడు శేఖర్ కమ్ముల. ఆయన దర్శకత్వంలో అక్కినేని నాగచైతన్య, సాయి పల్లవి హీరోహీరోయిన్లుగా రూపొందిన చిత్రం ‘లవ్ స్టోరి’. ‘ఫిదా’ లాంటి బ్లాక్ బస్టర్ హిట్ తరవాత శేఖర్ కమ్ముల నుంచి వస్తోన్న మరో ప్రేమకథ ఇది. ఇప్పటికే విడుదలైన ఫస్ట్ లుక్, ‘ఏయ్ పిల్లా’ సాంగ్, టీజర్ ప్రేక్షకులను విశేషంగా ఆకట్టుకున్నాయి. ఈ సినిమా కోసం అక్కినేని అభిమానులతో పాటు సాయి పల్లవి ఫ్యాన్స్ కూడా ఆసక్తిగా ఎదురుచూస్తున్నారు. మొత్తానికి చిత్ర నిర్మాతలు విడుదల తేదీని ప్రకటించారు. ఏప్రిల్ 16న ‘లవ్ స్టోరి’ ప్రేక్షకుల ముందుకు వస్తోంది. హాట్ సమ్మర్లో కూల్ లవ్ స్టోరిని ప్రేక్షకులు ఎంజాయ్ చేయబోతున్నారని చిత్ర యూనిట్ చెబుతోంది. విడుదల తేదీని ప్రకటిస్తూ కొత్త పోస్టర్ను చిత్ర యూనిట్ విడుదల చేసింది. ఈ పోస్టర్లో సాయి పల్లవి, నాగచైతన్య పతంగులు ఎగురవేస్తూ కనిపిస్తున్నారు. కాగా, నేచురల్ స్టార్ నాని హీరోగా రూపొందుతోన్న ‘టక్ జగదీష్’ కూడా ఏప్రిల్ 16నే విడుదల కాబోతోంది. ఈనెల 9న నాని తన సినిమా విడుదల తేదీని ప్రకటించారు. ఇప్పుడు అదే రోజున ‘లవ్ స్టోరి’ విడుదల కాబోతోంది. అంటే, బాక్సాఫీసు దగ్గర ఈ రెండు సినిమాలూ పోటీ పడనున్నాయి. ఇదిలా ఉంటే, ‘లవ్ స్టోరి’లో రాజీవ్ కనకాల, ఈశ్వరీరావు, దేవయాని ఇతర కీలక పాత్రల్లో నటించారు. ఈ చిత్రాన్ని శ్రీ వెంకటేశ్వర సినిమాస్ ఎల్ఎల్పి, అమిగోస్ క్రియేషన్స్ సంస్థలు సంయుక్తంగా నిర్మిస్తున్నాయి. కె నారాయణదాస్ నారంగ్, పి.రామ్మోహన్ రావు నిర్మాతలు. భాస్కర్ కటకంశెట్టి సహ నిర్మాత. పవన్ సీహెచ్ సంగీతం సమకూర్చిన ఈ సినిమాకు విజయ్ సి కుమార్ సినిమాటోగ్రఫీ అందించారు. ఇక ‘టక్ జగదీష్’కు శివ నిర్వాణ దర్శకత్వం వహించారు. సాహు గారపాటి, హరీష్ పెద్ది నిర్మాతలు. తమన్ సంగీతం సమకూర్చారు.
from Telugu Movie News | Movie News in Telugu | Movie Gossips in Telugu https://ift.tt/39ezTjB
v
No comments:
Post a Comment