వివాదంలో అల్లరి నరేష్ ‘బంగారు బుల్లోడు’.. స్వర్ణకార సంఘాల హెచ్చరిక

హీరోగా రూపొందిన ‘బంగారు బుల్లోడు’ చిత్రం ఈనెల 23న ప్రేక్షకుల ముందుకు వస్తోన్న సంగతి తెలిసిందే. విడుదలకు రెండు రోజులు ఉందనగా ఇప్పుడు ఈ చిత్రం వివాదంలో చిక్కుకుంది. ఈ సినిమాలోని కొన్ని సన్నివేశాలపై స్వర్ణకార సంఘాలు అభ్యంతరం వ్యక్తం చేస్తున్నాయి. ఆ అభ్యంతరకర సన్నివేశాలను తొలగించాలని కోరుతూ తెలంగాణ, ఆంధ్రప్రదేశ్ స్వర్ణకార సంఘాలు ఫిలిం ఛాంబర్ ఆఫ్ కామర్స్‌కు ఫిర్యాదు చేశాయి. ఈ మేరకు గురువారం విడివిడిగా వినతి పత్రాలు అందజేశాయి. ఒకరి బంగారు వస్తువులను మరొకరి కార్యక్రమానికి స్వర్ణకారులు ఇవ్వరని.. అలా ఇస్తున్నట్టు ట్రైలర్‌లో చూపించి స్వర్ణకారులను కించపరిచారని ఆంధ్రప్రదేశ్ స్వర్ణకార సంఘం అధ్యక్షుడు కర్రి వేణుమాధవ్ అన్నారు. కాబట్టి, సినిమాలో ఆ సన్నివేశంతో పాటు ఇంకా అలాంటి అభ్యంతరకర సన్నివేశాలు ఎన్ని ఉన్నా అన్నింటినీ తొలగించాలని ఆయన డిమాండ్ చేశారు. తమ వృత్తిపై నిందలు మోపేలా ఉన్న సన్నివేశాలను వెంటనే సినిమా నుంచి తొలగించాలని తెలంగాణ స్వర్ణకార సంఘం ప్రధాన కార్యదర్శి కందుకూరి పూర్ణాచారి డిమాండ్ చేశారు. సినిమా విడుదలకు ముందు తమకు నిర్మాత ప్రివ్యూ వేసి చూపించాలని అన్నారు. లేని పక్షంలో రెండు తెలుగు రాష్ట్రాల్లో ‘బంగారు బుల్లోడు’ సినిమా విడుదలను అడ్డకుంటామని హెచ్చరించారు. సినిమాలోని హీరోని స్వర్ణకారుడిగా చూపించినందుకు నిర్మాత రామబ్రహ్మం సుంకరకు, దర్శకుడు గిరి పాలికకు ధన్యవాదాలు చెబుతూనే.. సినిమాలో అభ్యంతర సన్నివేశాలు ఉన్నాయని తమ ఫిర్యాదులో ఇరు సంఘాలు పేర్కొన్నాయి. ప్రస్తుతం స్వర్ణకారులు పనులు లేక, వృత్తిపై ఆధారపడినా పూట గడవక తప్పని పరిస్థితుల్లో బ్యాంకుల్లో అప్రైజర్లుగా పనిచేస్తూ నమ్మకంగా జీవనం సాగిస్తున్నారని ఫిర్యాదులో స్వర్ణకార సంఘాలు వెల్లడించాయి. ఇలాంటి తరుణంలో ‘బంగారు బుల్లోడు’ సినిమాలో సన్నివేశాలు స్వర్ణకారులపై నమ్మకం పోయే విధంగా ఉన్నాయని ఆరోపించాయి. స్వర్ణకారుల మేలుకోరి ఆ సన్నివేశాలను తొలగించాలని డిమాండ్ చేశాయి. నిజానికి ఈ సినిమా కథ మొత్తం స్వర్ణకార సంఘాలు లేవనెత్తిన పాయింట్ చుట్టూనే అల్లుకున్నారు. బ్యాంకులో కుదువపెట్టిన బంగారాన్ని బ్యాంక్ మేనేజర్ వేరే అమ్మాయికి ఫంక్షన్లకు వేసుకోవడానికి ఇచ్చినట్టు ట్రైలర్‌లో చూపించారు. అలా ఇవ్వడం వల్లే చిక్కుల్లో పడినట్టు ట్రైలర్‌లో చూస్తే అర్థమవుతోంది. ఇప్పుడు స్వర్ణకార సంఘాలు కోరుతున్న ఆ సన్నివేశాలు తీయాలంటే సినిమానే ఆపేయాలి. మరి అది సాధ్యమా? స్వర్ణకార సంఘాల డిమాండ్లపై నిర్మాత అనిల్ సుంకర ఎలా స్పందిస్తారో చూడాలి.

from Telugu Movie News | Movie News in Telugu | Movie Gossips in Telugu https://ift.tt/3o5QuKE
v