సోనూ సూద్‌కు హైకోర్టులో చుక్కెదురు.. పిటిషన్ తిరస్కరణ

ప్రముఖ నటుడు సోనూ సూద్‌కు బోంబే హైకోర్టులో చుక్కెదురైంది. బృహన్‌ముంబై మున్సిపల్ కార్పోరేషన్ (బీఎంసీ) నోటీసును సవాల్ చేస్తూ వేసిన పిటిషన్‌ను బోంబే హైకోర్టు తిరస్కరించింది. సోనూ సూద్ జుహులోని తన నివాసంలో అక్రమ నిర్మాణాలకు పాల్పడుతున్నారంటూ ఆయనకు బీఎంసీ నోటీసు పంపింది. ఆ నోటీసును సవాల్ చేస్తూ సోనూ హైకోర్టుకు వెళ్లారు. దీనిపై విచారణ జరిపిన హైకోర్టు పిటిషన్‌ను కొట్టివేసింది. సోనూ సూద్ పిటిషన్‌ను తిరస్కరిస్తున్నట్టు న్యాయమూర్తి జస్టిస్ పృథ్వీరాజ్ చవాన్ వెల్లడించారు. సోనూ సూద్‌కు జుహులో ఆరంతస్తుల రెసిడెన్సియల్ కాంప్లెక్స్ ఉంది. ఈ బిల్డింగ్‌ను ఆయన హోటల్‌గా మార్చారు. ఎలాంటి అనుమతి లేకుండా రెసిడెన్సియల్ కాంప్లెక్స్‌ను కమర్షియల్ బిల్డింగ్‌గా మార్చారని ఆరోపిస్తూ బీఎంసీ ఆయనకు నోటీసు పంపింది. ఈ నోటీసుపై సోనూ కోర్టుకెళ్లారు. సోనూ పిటిషన్‌పై గతవారం కౌంటర్ ఇచ్చిన బీఎంసీ.. నిబంధనలను అతిక్రమించడం ఆయనకు అలవాటు అని కోర్టుకు వెల్లడించింది. ‘‘నిబంధనలను అతిక్రమించడం సోనూ సూద్‌కు అలవాటు. అక్రమంగా నిర్మించిన కట్టడాల ద్వారా ఆదాయాన్ని పొందాలని చూస్తారు. అందుకే, మేం కూల్చివేసిన చోటే హోటల్ కోసం అక్రమంగా మళ్లీ నిర్మాణం మొదలుపెట్టారు. దీనికి ఎలాంటి అనుమతి తీసుకోలేదు’’ అని బీఎంసీ అధికారులు కోర్టుకు విన్నవించారు. అంతేకాదు, మహారాష్ట్ర రీజియన్ అండ్ టౌన్ ప్లానింగ్ (ఎంఆర్‌టీపీ) యాక్ట్ కింద సోనూ సూద్‌పై చర్యలు తీసుకోవాలని జుహు పోలీసులను బీఎంసీ కోరింది. మరోవైపు, తాను ఇప్పటికే బీఎంసీ అనుమతులు తీసుకున్నానని సోనూ సూద్ అంటున్నారు. కేవలం మహారాష్ట్ర కోస్టల్ జోన్ మేనేజ్‌మెంట్ అథారిటీ క్లియరెన్స్ కోసం వేచి చూస్తున్నానని చెప్పారు. అంతేకాకుండా, తన జుహు రెసిడెన్సియల్ కాంప్లెక్స్ నిర్మాణంలో ఎలాంటి అవకతవకలు జరగలేదని ఆయన స్పష్టం చేశారు. ‘‘నేనెప్పుడూ చట్టానికి కట్టుబడే ఉంటాను. కరోనా వైరస్ విజృంభించిన సమయంలో ఆ మహమ్మారిపై పోరాడిన వైద్య సిబ్బందికి స్థావరంగా ఈ హోటల్‌ను వాడాను. ఒక వేళ హోటల్‌గా ఉంచడానికి అనుమతి ఇవ్వకపోతే దీన్ని మళ్లీ రెసిడెన్సియల్ కాంప్లెక్స్‌గా మార్చేస్తాను’’ అని సోనూ సూద్ స్పష్టం చేశారు. కాగా, కిందటేడాది లాక్‌డౌన్ సమయంలో వలస కార్మికులను తన సొంత ఖర్చులతో స్వస్థలాలకు పంపి రియల్ హీరో అయ్యారు సోనూ సూద్. అలాంటి వ్యక్తిపై మహారాష్ట్ర ప్రభుత్వం కక్షగడుతోందని ఇప్పుడు విమర్శలు వస్తున్నాయి.

from Telugu Movie News | Movie News in Telugu | Movie Gossips in Telugu https://ift.tt/3sKbudC
v