ఆ సినిమా ఒరిజినల్.. మీలా కాపీ కాదు: రాజమౌళిపై దర్శకుడు తీవ్ర వ్యాఖ్యలు

దర్శకధీరుడు ఎస్.ఎస్.రాజమౌళి ఇటీవల ఒక టీవీ ఛానెల్‌తో మాట్లాడుతూ ఆస్కార్ విన్నింగ్ మూవీ ‘పారసైట్’ తనకు నచ్చలేదని అన్నారు. ఈ కొరియన్ మూవీని చూస్తూ మధ్యలోనే నిద్రపోయానని వెల్లడించారు. ‘‘పారసైట్ ఎందుకో నాకు నచ్చలేదు. ఈ సినిమా ప్రారంభంలో కొంచెం నెమ్మదిగా సాగినట్టు అనిపించింది. కాస్త ఆలస్యంగా అంటే రాత్రి 10 గంటలకు ఈ సినిమాను చూడటం ప్రారంభించాం. సినిమా సగం పూర్తయ్యేసరికి నేను నిద్రలోకి జారుకున్నాను’’ అని రాజమౌళి చెప్పుకొచ్చారు. ఆస్కార్ అవార్డు సాధించిన సినిమాపై రాజమౌళి చేసిన వ్యాఖ్యలు కొంత మంది నెటిజన్లను ఆశ్చర్యానికి గురిచేశాయి. కొంతమంది అయితే రాజమౌళిపై విమర్శలు కూడా చేశారు. అయితే, తొలిసారి ఒక సెలబ్రిటీ రాజమౌళిపై తీవ్ర విమర్శలు చేశారు. ఆయన ఎవరో కాదు ‘మిఠాయి’ సినిమా దర్శకుడు ప్రశాంత్ కుమార్. రాజమౌళిని కాపీ క్యాట్‌గా అభివర్ణిస్తూ ఆయనకు బహిరంగ లేఖ రాశారు ప్రశాంత్. ‘వాస్తవికత గౌరవం పొందడానికి అర్హమైనది’ అంటూ రాజమౌళిపై విరుచుకుపడ్డారు. ఈ మేరకు తన లేఖను ట్వీట్ చేశారు. ‘‘పారసైట్ సినిమా చూస్తూ ఎస్.ఎస్.రాజమౌళి నిద్రపోయారు. సినిమా బోరింగ్‌గా ఉండటంతో నిద్రలోకి జారుకున్నారు. ‘పారసైట్’ ఒరిజినల్ పీస్ ఆఫ్ వర్క్. ఒరిజినాలిటీ గౌరవానికి అర్హమైనది. భాషా సరిహద్దులను దాటుకొని అందరినీ మెప్పిస్తే అది గొప్ప సినిమా. పారాసైట్ అలాంటి సినిమానే. అందుకే, రాజమౌళికి నా బహిరంగ లేఖ’’ అని ప్రశాంత్ తన ట్వీట్‌లో పేర్కొన్నారు. అదే ట్వీట్‌లో లేఖను పొందుపరిచారు. ఈ లేఖలో రాజమౌళిని కాపీ క్యాట్‌గా అభివర్ణించిన ప్రశాంత్.. ఉదాహరణకు ‘సై’ సినిమాను తీసుకున్నారు. కనీసం క్రెడిట్ కూడా ఇవ్వకుండా వేరే సినిమాల్లోని మొత్తం సన్నివేశాలను ‘సై’ మూవీలో రాజమౌళి ఎత్తేశారని ఆరోపించారు. అయినప్పటికీ దీనిపై ఇండస్ట్రీలోని మిగిలిన దర్శకులు బయటికి వచ్చి మాట్లాడరని కూడా అన్నారు. రాజమౌళి సినిమా ఎలా ఉన్నాయో ప్రపంచ వేదికపై ఎవ్వరూ చర్చించరని తాను అనుకుంటున్నట్టు చెప్పారు. అలాగే, సినిమా ప్రపంచం మొత్తం గౌరవించిన ఒక సినిమాను జడ్జ్ చేసే హక్కు కూడా రాజమౌళి లేదని తాను భావిస్తున్నట్టు పేర్కొన్నారు. మొత్తం మీద రాజమౌళిపై ఎవ్వరూ చేయనన్ని వ్యాఖ్యలు చేశారు ప్రశాంత్. కాగా, ఉత్తమ చిత్రంగా ఆస్కార్ అవార్డు సాధించిన తొలి ఇంగ్లీషేతర సినిమా ‘పారసైట్’. బాంగ్ జూన్ హో దర్శకత్వం వహించిన ఈ సినిమాపై ప్రపంచ వ్యాప్తంగా ప్రశంసల వర్షం కురిసింది. అయితే, ఈ డార్క్ కామెడీ సినిమా రాజమౌళికి నచ్చకపోవడం చర్చకు దారితీసింది. నిజానికి రాజమౌళికి యాక్షన్ సినిమాలు బాగా నచ్చుతాయి. ఈ విషయం గతంలో ఆయన చెప్పారు. కానీ, ఈ సినిమా నచ్చలేదన్న విషయాన్ని ఆయన బహిరంగంగా చెప్పకుండా ఉంటే బాగుండేది. ఇప్పుడు విమర్శలు ఎదుర్కోవాల్సి వస్తోంది.

from Telugu Movie News | Movie News in Telugu | Movie Gossips in Telugu https://ift.tt/3eGGCUi
v