పెంచల్ దాస్‌‌కు పవన్ కళ్యాణ్ సత్కారం.. త్రివిక్రమ్ మరో అవకాశం!

రాయలసీమ జానపదాన్ని, మాండలికాన్ని పాట రూపంలో తెలుగు ప్రేక్షకులకు పరిచయం చేసిన కవి, గాయకుడు పెంచల్ దాస్. నేచురల్ స్టార్ నాని హీరోగా వచ్చిన ‘కృష్ణార్జున యుద్ధం’ సినిమాలో ‘దారి చూడు దుమ్ము చూడు’ అనే పాటతో ఇండస్ట్రీకి పరిచయం అయ్యారు పెంచల్ దాస్. తన తొలి పాటతోనే తెలుగు ఆడియన్స్‌ ఊగిపోయేలా చేశారు. ఎక్కడో కడప జిల్లాలోని చిట్వేలు మండలం దేవమాచుపల్లి అనే మారుమూల గ్రామానికి చెందిన పెంచల్ దాస్.. ఈ ఒక్క పాటతో రెండు తెలుగు రాష్ట్రాల్లో గుర్తింపు తెచ్చుకున్నారు. ఆ తరవాత త్రివిక్రమ్, ఎన్టీఆర్ కాంబినేషన్‌లో వచ్చిన ‘అరవింద సమేత’ సినిమాకు పనిచేసి తన ఉనికిని మరింత చాటుకున్నారు. ఈ సినిమాలో ఎన్టీఆర్‌తో సహా చాలా మంది ఆర్టిస్టులకు రాయలసీమ మాండలికం నేర్పించింది ఆయనే. అలాగే, ఈ సినిమా కోసం ‘రెడ్డమ్మ తల్లి’ అనే ఎమోషనల్ సాంగ్‌ను ఆయన రచించారు. తాజాగా, ‘శ్రీకారం’ సినిమాలో ‘వస్తానంటివో పోతానంటివో’ అనే పాటను రాసి స్వయంగా ఆలపించారు. ఈ పాట కూడా సంగీత ప్రియులను విపరీతంగా అలరిస్తోంది. సోమవారం ఖమ్మంలో జరిగిన ‘శ్రీకారం’ ప్రీ రిలీజ్ ఈవెంట్‌లో పెంచల్ దాస్‌ను ప్రత్యేకంగా చిరంజీవి అభినందించారు. నిన్న ఖమ్మంలో అన్నయ్య అభినందనలు అందుకున్న పెంచల్ దాస్.. ఈరోజు హైదరాబాద్‌లో తమ్ముడి సత్కారాన్ని అందుకున్నారు. మలయాళ సూపర్ హిట్ మూవీ ‘అయ్యప్పనుమ్ కోషియుం’ చిత్రాన్ని పవన్ కళ్యాణ్, రానా కాంబినేషన్‌లో రీమేక్ చేస్తున్న విషయం తెలిసిందే. సాగర్ కె చంద్ర ఈ చిత్రానికి దర్శకత్వం వహిస్తున్నారు. త్రివిక్రమ్ రచనా సహకారం అందిస్తున్నారు. ఈ సినిమా సెట్స్‌‌కు మంగళవారం త్రివిక్రమ్‌తో కలిసి పెంచల్ దాస్‌ వెళ్లారు. ఆయన్ని శాలువా, వెండి విగ్రహంతో పవన్ సత్కరించారు. పెంచల్‌ దాస్‌ రాయలసీమ ప్రాంత జానపదాలను, అక్కడి మాండలికాన్నీ నేటి తరానికి చేరువ చేస్తున్న విధానం అభినందనీయం అని పవన్‌ కళ్యాణ్‌ అన్నారు. ఈ సందర్భంగా తెలుగు జానపదాలు, సీమ మాండలికంపై ఇరువురు మాట్లాడుకున్నారు. అనంతరం పెంచల్ దాస్‌ను పవన్ సత్కరించారు. ఇంతకీ పెంచల్ దాస్.. త్రివిక్రమ్, పవన్‌ కళ్యాణ్‌ను ఊరకనే కలిశారా, లేదంటే ఈ సినిమాలో ఆయనతో ఏమైనా పాట పాడిస్తు్న్నారా వంటి విషయాలు త్వరలోనే తెలుస్తాయి. అలా అయితే పెంచల్ దాస్‌కు త్రివిక్రమ్ మరో అవకాశం ఇచ్చినట్టే. ఎందుకంటే, ‘అరవింద సమేత’ సినిమాకు పెంచల్ దాస్‌ను వాడుకోవాలనే ఆలోచన వచ్చింది మాటల మాంత్రికుడికే.

from Telugu Movie News | Movie News in Telugu | Movie Gossips in Telugu https://ift.tt/30oB0bd
v