‘అరణ్య’ ట్రైలర్: ఏనుగుల ఇంట్లో మనుషుల అరాచకం!

రానా దగ్గుబాటి వైవిధ్యమైన పాత్రలో నటించిన బహుభాషా చిత్రం ‘అరణ్య’. హిందీలో ‘హాథీ మేరే సాథీ’గా, తమిళంలో ‘కాదన్’గా విడుదలవుతోంది. ప్రభు సాల్మన్ దర్శకత్వం వహించిన ఈ సినిమాకు సంబంధించి ఇప్పటికే విడుదలైన ప్రచార చిత్రాలు, టీజర్ ప్రేక్షకులను విశేషంగా ఆకట్టుకున్నాయి. ముఖ్యంగా రానా గెటప్, ఆయన మేనరిజం ఈ సినిమాకు ప్రత్యేక ఆకర్షణగా నిలిచింది. అందుకే, ఈ సినిమా కోసం ప్రేక్షకులు ఆసక్తిగా ఎదురుచూస్తున్నారు. లాక్‌డౌన్ కారణంగా ఆలస్యమైన ఈ చిత్రం ఎట్టకేలకు మార్చి 26న ప్రేక్షకుల ముందుకు వస్తోంది. ఇదిలా ఉంటే, చిత్ర ప్రచారంలో భాగంగా ‘అరణ్య’ ట్రైలర్‌ను బుధవారం ప్రేక్షకుల ముందుకు తీసుకొచ్చారు. ఈ ట్రైలర్ సినిమాపై ఆసక్తిని మరింత పెంచుతోంది. ‘‘ఏనుగులు మనకన్నా చాలా తెలివైనవి. వెరీ ఎమోషనల్.. సెంటిమెంటర్ అండ్ సో కేరింగ్’’ అనే డైలాగుతో ట్రైలర్ మొదలైంది. ట్రైలర్‌లో విజువల్స్, రానా స్క్రీన్ ప్రెజన్స్ మతిపోగొడుతున్నాయి. ఏనుగులు అత్యధికంగా ఉండే అడవిలో ఒక టౌన్‌షిప్ కట్టడానికి ప్లాన్ చేయడంతో అసలు సమస్య మొదలవుతుందని ట్రైలర్ చూస్తే అర్థమవుతోంది. ఈ కుట్రలో అటవీ శాఖ మంత్రి హస్తం కూడా ఉంటుంది. ఏనుగులు ఏళ్ల తరబడి నీళ్లు తాగడానికి వెళ్లే మార్గాన్ని మూసివేస్తూ టౌన్‌షిప్ చుట్టూ గోడను నిర్మిస్తారు. ఈ చర్యపై హీరో ఎలా ఎదురు తిరిగాడు, ఎలా విజయం సాధించాడు అనేదే సినిమా. ట్రైలర్ చివరలో ‘ఈ ఇష్యూ గురించి ఒక డీటెయిల్డ్ ఇంటర్వ్యూ ఇవ్వగలరా’ అని రానాను ఒక లేడీ జర్నలిస్ట్ అడుగుతుంది. దీనికి రానా స్పందిస్తూ.. ‘ఏనుగుల ఇంట్లో మనసుల అరాచకం. డు యు హేవ్ గట్స్ టు పుట్ హెడ్‌లైన్ లైక్ దిస్ (ఈ విధంగా శీర్షిక పెట్టే ధైర్యం మీకుందా)’ అని ప్రశ్నించే విజువల్ ఆసక్తి రేపుతోంది. 25 సంవ‌త్సరాలుగా అర‌ణ్యంలో జీవిస్తున్న ఒక మ‌నిషి క‌థే ‘అరణ్య’. ఈ చిత్రం ద్వారా ప‌ర్యావ‌ర‌ణ స‌మ‌స్యలు, అట‌వీ నిర్మూల‌న సంక్షోభం గురించి ప్రజలకు చెప్పబోతున్నారు. ఈ సినిమా మొత్తం థాయిలాండ్ అడవుల్లో చిత్రీకరించారు. ఈ చిత్రంలో రానాతో పాటు తమిళ నటుడు విష్ణు విశాల్, జోయా హుస్సేన్‌, శ్రియ పిల్గావోంక‌ర్ కీల‌క పాత్రలు పోషించారు. శంత‌ను మొయిత్రా సంగీతం స‌మ‌కూర్చిన ఈ చిత్రానికి ఎ.ఆర్‌. అశోక్ కుమార్ సినిమాటోగ్రాఫ‌ర్‌గా ప‌నిచేశారు. ఈరోస్ ఇంటర్నేషనల్ సంస్థ ఈ చిత్రాన్ని నిర్మించింది. తెలుగు వర్షన్‌కు వనమాలి మాటలు, పాటలు రాశారు. ఆస్కార్ విజేత రసూల్ పూకుట్టి ఈ సినిమాకు సౌండ్ డిజైనర్. కథ, స్క్రీన్ ప్లే, దర్శకత్వం ప్రభు సాల్మన్.

from Telugu Movie News | Movie News in Telugu | Movie Gossips in Telugu https://ift.tt/3bcLL6Y
v