‘చావు కబురు చల్లగా’ రివ్యూ.. బస్తీ బాలరాజు బుర్రపాడు!

చావు ఇంటికి వెళ్లి బుద్ధి ఉన్నోడు ఎవడైనా ప్రేమలో పడతాడా? అదికూడా చచ్చిపోయినోడి భార్యని ప్రేమిస్తాడా? భర్త పోయి భార్య బోరు బోరున ఏడుస్తుంటే.. భలే ఏడుస్తున్నారండీ.. మీరు ఏడుస్తుంటే భలే అందంగా ఉన్నారండీ.. మీరంటే నాకిష్టం అండీ అని చెప్పే బుద్ధిలేని బస్తీ బాలరాజు వెరైటీ ప్రేమకథే ‘చావు కబురు చల్లగా’. మెటర్నరీ నర్స్‌గా ఎంతో మందికి ప్రాణం పోసి.. పుట్టుకలలో ముడిపడ్డ ఆమె జీవితం.. ఎప్పుడు ఎవడు చస్తాడా.. తన బండిలో స్మశానానికి తోలేద్దామా అని ఎదురుచూసే బాలరాజు‌తో ఎలా ముడిపడింది.. ఈ బస్తీ బాలరాజు ‘చావు కబురు ఎంత చల్లగా’ చెప్పాడో సమీక్షలో చూద్దాం. బస్తీ బాలరాజు (కార్తికేయ) శవాలను మోసికెళ్లే వ్యాన్ డ్రైవర్. అతనికి చావు తప్ప మరోటి తెలియదు. తండ్రి మంచానికి పరిమితమైన లేవలేని పరిస్థితిలో ఉన్నా.. తల్లి గంగమ్మ (ఆమని) ఇంటి బాధ్యతను మోస్తున్నా.. బాలరాజు మాత్రం తన జల్సాలను తాను చూసుకుంటుంటాడు. అయితే మల్లిక (లావణ్య త్రిపాఠి) చిన్న వయసులో భర్తను కోల్పోయి బాధలో ఉండగా.. శవాన్ని తన వ్యాన్‌లో తీసుకుని రావడానికి వెళ్లి.. తొలిచూపులోనే మల్లిక ప్రేమలో పడతాడు బాలరాజు. ఇతని పోకిరి వేషాలతో మల్లికను ఇబ్బందులు పెడుతూ ఆమె వెంటపడుతుంటాడు బాలరాజు. మల్లిక భర్త ఆలోచనల బయటకు రాలేక.. బాలరాజుని అసహ్యించుకుంటుంది. అలాంటి మల్లిక.. బాలరాజు ప్రేమలో ఎలా పడింది? బ్రతుకు, చావు, పెళ్లి, ప్రేమ నేపథ్యంలో వీరిద్దరి మధ్య దారితీసిన పరిస్థితులు ఏంటి? తండ్రి బతికి ఉండగా కొడుకు తల్లికి పెళ్లి చేయాలని ఎందుకు అనుకుంటాడు.. ఆ తల్లి వేరే వ్యక్తిగా ఎందుకు చనువుగా ఉంటుంది? అన్నదే మిగిలిన కథ. విధవరాలిని ప్రేమించడం ఏంట్రా బాబూ.. ఇదేదో కొత్తగా ఉందే అనేట్టుగా టీజర్, ట్రైలర్‌, ప్రమోషన్స్‌తో హైప్ తీసుకు వచ్చింది చిత్ర యూనిట్. ఇక దర్శకుడు కౌశిక్ చావు.. పుట్టుక నేపథ్యంలో గమ్మత్తైన పాయింట్‌ని తీసుకుని అందమైన ప్రేమకథగా మలిచాడు. అయితే దాన్ని కన్వెన్సింగ్‌గా బ్యాలెన్స్ చేయడంలో ఈ కొత్త దర్శకుడి అనుభవం చాల్లేదని అనిపిస్తుంది ఈ చిత్రం చూస్తే. సినిమా ఫస్టాఫ్ మొత్తం హీరోయిన్ వెంటపడే సీన్లతోనే నడిపించారు.. బస్తీ బాలరాజు క్యారెక్టర్‌ని ఎస్టాబ్లిష్ చేసే సన్నివేశాలు మాసీగా వినోదాన్ని పంచుతాయి. మల్లిక క్యారెక్టర్ ఎంటర్ అయిన తరువాత అసలు కథ మొదలు కాగా.. స్లో నెరేషన్‌తో బోర్ కొట్టించారు. ఈ సినిమా కథలో బలం ఉన్నా.. కథనం ఆసక్తికరంగా లేకపోవడంతో రొటీన్‌గా సా..గిపోయింది. రొటీన్ ఫార్ములాతో భారంగా సాగుతున్న కథకు సాంగ్స్ స్పీడ్ బ్రేకర్స్‌గా అనిపిస్తాయి.. మళ్లీ సాంగ్ వచ్చేసిందా? అనిపిస్తుంది తప్పతే పాటలు కథలో భాగం కాలేకపోయాయి. వినసొంపైన పాటల్ని సరిగా వాడుకోలేదేమో అనిపిస్తుంది. కామెడీ సీన్లు, సాంగ్స్ కావాలని ఇరికించినట్టుగానే అనిపిస్తాయి. ఇక ఈచిత్రంలో సీనియర్ నటి ఆమని పాత్ర చాలా వైవిధ్యంగా అనిపిస్తుంది. మంచానికే పరిమితమైన భర్త.. బాధ్యతలేకి కొడుకు మధ్య నలిగిపోతూ.. ఇంటి బాధ్యతను మోసే ఇల్లాలి పాత్రలో ఒదిగిపోయింది. అయితే భర్త ఉండగానే మరో వ్యక్తి మోహన్ (శ్రీకాంత్ అయ్యంగార్)తో వివాహేతర సంబంధం పెట్టుకోవడం.. దానికి దర్శకుడు బలమైన కారణాన్ని చూపించినా అంత కన్వెన్సింగ్‌గా అనిపించదు. పైగా తండ్రి ఉండగా కొడుకే తల్లికి మరో పెళ్లి చేయాలని అనుకోవడం వాస్తవ పరిస్థితులకు దూరంగా అనిపిస్తుంది. ఇలాంటి నిర్ణయానికి బలమైన కారణం చూపించలేదేమో అనిపిస్తుంది. తల్లి కొడుకుల మధ్య వచ్చే ఎమోషనల్ సీన్స్‌కి పెద్ద పీట వేశాడు దర్శకుడు. నీ రంకు నాకు నచ్చడం లేదని కొడుకు తల్లిని నిలదీయడం ద్వారా హీరోయిజంలో పసలేకుండా పోయింది. ఇక ‘కొడుకు ప్రేమను ఇవ్వగలను తప్పితే.. మొగుడు ప్రేమను ఇవ్వలేనుగా’ అని తల్లి కొడుకుతో చెప్పే డైలాగ్ డైజస్ట్ చేసుకోవడం కష్టంగా అనిపిస్తుంది. ఇలాంటి డైలాగ్‌లు సినిమాలో చాలానే ఉన్నాయి. లేవలేని మాట్లాడలేని స్థితిలో మంచానికి పరిమితం అయిన తండ్రి దగ్గర కూర్చుని ‘నీ పెళ్లాన్ని ప్రేమించినోడికి త్యాగం చేసేస్తున్నారా నాన్నా’ అని కొడుకు తండ్రితో చెప్పడం కూడా రిసీవ్ చేసుకోవడానికి ఇబ్బందిగానే అనిపిస్తుంది. హీరో పాత్ర ఊరమాస్ అని చెప్పడానికి మరీ ఇంత దిగజార్చాల్సిన అవసరం లేదేమో అనిపిస్తుంటుంది. బంధాలు, బంధుత్వాల విషయంలో హీరోయిజాన్ని సరిగా ఎలివేట్ చేయడం మాట అటుంచితే బాలరాజులో ప్రేయసిపై ప్రేమ తప్ప ఎలాంటి ఎమోషన్స్ లేకుండా చివరి వరకూ కథ నడపడం మైనస్ అయ్యింది. ఫస్టాఫ్‌తో పోల్చుకుండా సెకండాఫ్ చాలా బెటర్.. తల్లీ కొడుకుల మధ్య వచ్చే సీన్స్ బాగా పండాయి. ఆమని వేరే వ్యక్తితో ఎందుకు చనువుగా ఉంటుంది అనే క్యూరియాసిటీ క్రియేట్ అయ్యేలా చేశారు. అయితే క్లైమాక్స్‌కి వచ్చేసరికి మళ్లీ రొటీన్ ఫార్ములా మాదిరిగానే అనిపిస్తుంది. హీరోయిన్ వేరే పెళ్లికి ఒప్పుకోవడం.. హీరో వెళ్లి నాలుగు మాటలు చెప్పడంతో పేరెంట్స్ మారిపోయి.. హీరోయిన్ హీరో చేతుల్లో పెట్టడం లాంటివి రొటీన్ రోతగానే అనిపిస్తుంది. ఇక పెర్ఫామెన్స్ విషయానికి వస్తే.. బస్తీ బాలరాజు పాత్రలో కార్తికేయ ఒదిగిపోయాడు. ఊరమాస్ లుక్‌లో అదరగొట్టాడు. అయితే హావభావాల విషయంలో కార్తీకేయ ఇంకా నేర్చుకునే దశలోనే ఉన్నాడని అనిపిస్తుంది. ఎమోషనల్ సీన్స్‌లో పూర్తి పరిణితి సాధించిన నటుడిగా అయితే అనిపించడు. లావణ్య త్రిపాఠి భర్తను పోగొట్టుకున్న విధవరాలి పాత్రలో ఛాలెంజింగ్ రోల్ చేసింది. మల్లిక పాత్రకు పూర్తి న్యాయం చేసింది. గ్లామర్‌ హంగులకు స్కోప్ ఉన్న పాత్ర కాకపోయినప్పటికీ యాక్టింగ్‌కి స్కోప్‌ ఉన్న పాత్రలో బాగా చేసింది. సీనియర్ నటి ఆమని గంగమ్మ పాత్రలో తన సీనియారిటీని చూపించింది. మొక్కజొన్న పొత్తులు అమ్మే గంగమ్మ.. మందు కొడుతూ ఊర మాస్ గెటప్‌లో అలరించింది. ఇక ఆమని ప్రియుడి పాత్రలో నటించిన శ్రీకాంత్ అయ్యర్ కామెడీ పండిస్తూనే తన పాత్రకు పూర్తి న్యాయం చేశారు. మురళీ శర్మ.. హీరోయిన్ మామ పాత్రలో ఆకట్టుకున్నారు. క్లైమాక్స్ సీన్‌లో తన సీనియారిటీని చూపించారు. కమెడియన్ భద్రం, రంగస్థలం మహేష్‌లు హీరో స్నేహితులుగా ఉన్నంతలో కామెడీ బాగానే పండించారు. ఇక అనసూయ ఐటమ్ సాంగ్ కూడా పెద్దగా ప్రభావం చూపించలేకపోయింది. కేవలం ఆమె అందచందాలను చూపించడం కోసమే అనేట్టుగా ఉంది. జానీ మాస్టర్ కొరియోగ్రఫీ కూడా అనసూయ అందాల ప్రదర్శన కోసమే కంపోజ్ చేసినట్టుగా అనిపిస్తుంది. అయితే గ్లామర్ పరంగా అనసూయ జబర్దస్త్ అనిపిస్తుంది. టెక్నికల్ విషయానికి వస్తే.. చేక్స్ బిజోయ్ సాంగ్స్ బాగున్నాయి.. అయితే కథకి కనెక్ట్ అయ్యేలా వాడుకోలేదేమో అనిపిస్తుంది. కామ్ చావ్లా సినిమాటోగ్రఫీ బాగానే కుదిరింది. అయితే సత్య ఎడిటింగ్ వర్క్ పెద్దగా వర్కౌట్ కాలేదు. కత్తెర వేయాల్సిన సీన్లు ఫస్టాఫ్‌లో చాలానే ఉంటాయి. ముఖ్యంగా హీరోయిన్ వెంటపడే సీన్లు తగ్గిస్తే క్రిస్పీగా అనిపించేది. మిగిలిన నిర్మాణ విలువలు సినిమా రేంజ్‌కి తగ్గట్టే ఉన్నాయి. మొత్తంగా బస్తీ బాలరాజు ‘చావు కబురు చల్లగా’ చెప్పాడు కానీ.. అభిమానుల అంచనాలకు రీచ్ కాలేదనే చెప్పాలి.

from Telugu Movie News | Movie News in Telugu | Movie Gossips in Telugu https://ift.tt/3c121bB
v