‘చిత్రలహరి’, ‘ప్రతిరోజూ పండగే’, ‘సోలో బ్రతుకే సో బెటర్’ చిత్రాలతో వరుస విజయాలను సొంతం చేసుకున్న సుప్రీమ్ హీరో సాయి తేజ్ మరో ఆసక్తికర మూవీతో ప్రేక్షకుల ముందుకు వచ్చేందుకు సిద్ధమవుతున్నారు. ‘ప్రస్థానం’ వంటి పొలిటికల్ థ్రిల్లర్తో విమర్శకుల ప్రశంసలు అందుకున్న దర్శకుడు దేవ్ కట్టా దర్శకత్వంలో సాయి తేజ్ హీరోగా సినిమా రూపొందుతోన్న సంగతి తెలిసిందే. ఈ చిత్రానికి ‘రిపబ్లిక్’ అనే టైటిల్ను ఖరారు చేశారు. జె.బి.ఎంటర్టైన్మెంట్స్, జీ స్టూడియోస్ పతాకాలపై ఈ చిత్రాన్ని జె.భగవాన్, జె.పుల్లారావు నిర్మిస్తున్నారు. గణతంత్ర దినోత్సవం సందర్భంగా ఈ సినిమా టైటిల్, మోషన్ పోస్టర్ను చిత్ర యూనిట్ సోమవారం విడుదల చేసింది. ‘‘యువరానర్.. ప్రజలు ఎన్నుకున్న రాజకీయ నాయకులు.. శాసనాలను అమలు చేసే ప్రభుత్వోద్యోగులు.. న్యాయాన్ని కాపాడే కోర్టులు... ఈ మూడు గుర్రాలు ఒకరి తప్పులు ఒకరు దిద్దుకుంటూ క్రమబద్ధంగా సాగినప్పుడే అది ప్రజాస్వామ్యమవుతుంది.. ప్రభుత్వమవుతుంది.. అదే అసలైన రిపబ్లిక్’’ అంటూ సాయితేజ్ వాయిస్లో టైటిల్ అర్థాన్ని చెప్పి మోషన్ పోస్టర్ను డిఫరెంట్గా డిజైన్ చేశారు. ఈ మోషన్ పోస్టర్ను ట్విట్టర్ ద్వారా షేర్ చేసిన సాయి తేజ్.. ఇలాంటి సినిమాలో నటిస్తుండం గర్వంగా ఉందని పేర్కొన్నారు. అలాగే, దర్శకుడు దేవ్ కట్టా విజన్ను తన ద్వారా చెప్పడం ఆనందంగా ఉందన్నారు. మోషన్ పోస్టర్ను విడుదల చేసిన సందర్భంగా నిర్మాతలు జె.భగవాన్, జె.పుల్లారావు మాట్లాడుతూ.. ‘రిపబ్లిక్ అనే పవర్ఫుల్ టైటిల్తో సాయి తేజ్ హీరోగా దేవా కట్ట గారి దర్శకత్వంలో రూపొందుతోన్న మా సినిమా ప్రస్తుతం చిత్రీకరణ దశలో ఉంది. ఈ ఏడాది సమ్మర్లో సినిమాను ప్రేక్షకుల ముందుకు తీసుకువచ్చేలా సన్నాహాలు చేస్తున్నాం’ అని అన్నారు. కాగా, ఈ చిత్రంలో సాయి తేజ్ సరసన ఐశ్వర్య రాజేష్ హీరోయిన్గా నటిస్తున్నారు. జగపతిబాబు, రమ్యకృష్ణ, సుబ్బరాజు, రాహుల్ రామకృష్ణ, బాక్సర్ దిన ముఖ్య పాత్రలు పోషిస్తున్నారు. మణిశర్మ సంగీతం సమకూరుస్తున్న ఈ చిత్రానికి ఎం.సుకుమార్ సినిమాటోగ్రఫీ అందిస్తున్నారు. కె.ఎల్.ప్రవీణ్ ఎడిటర్. దేవ్ కట్టా, కిరణ్ జయ్కుమార్ స్క్రీన్ప్లే అందిస్తున్నారు. సుద్దాల అశోక్ తేజ, రెహమాన్ పాటలు రాశారు. కథ, మాటలు, దర్శకత్వం దేవ్ కట్టా.
from Telugu Movie News | Movie News in Telugu | Movie Gossips in Telugu https://ift.tt/39dXGA9
v
No comments:
Post a Comment