హైదరాబాద్ వరద ఎఫెక్ట్.. ట్విట్టర్‌ను వీడిన బ్రహ్మాజీ

సినీ నటుడు సోషల్ మీడియా ప్లాట్‌ఫాం ట్విట్టర్ నుంచి తప్పుకున్నారు. ప్రస్తుతానికి తన ట్విట్టర్ అకౌంట్‌ను డీయాక్టివేట్ చేశారు. ట్విట్టర్‌లో వరదలా వస్తోన్న తిట్లపురాణాన్ని తట్టుకోలేక ఆయన ఈ నిర్ణయం తీసుకున్నారు. హైదరాబాద్ వరదలను ఉద్దేశించి ఆయన సరదాగా చేసిన ఒక ట్వీట్ మిస్ ఫైర్ అయిన సంగతి తెలిసిందే. ఇలాంటి పరిస్థితుల్లో సాయం చేయడం మాని సెటైర్లు వేస్తావా అంటూ కొంత మంది నెటిజన్లు బ్రహ్మాజీని ట్రోల్ చేయడం మొదలుపెట్టారు. అత్యంత దారుణంగా తిట్టిపోశారు. ఇక ఈ తలనొప్పి తట్టుకోలేక ఆయన ట్విట్టర్ అకౌంట్‌ను డీయాక్టివేట్ చేశారు. హైదరాబాద్ నగరాన్ని భారీ వర్షాలు ముంచెత్తిన విషయం తెలిసిందే. గడిచిన 100 ఏళ్లలో ఎన్నడూ లేని విధంగా హైదరాబాద్‌‌లో భారీ వర్షపాతం నమోదైంది. దీంతో నాలాలు, చెరువులు పొంగి నగరంలోని చాలా ప్రాంతాలు నీట మునిగాయి. ఈ ప్రాంతాల్లో బ్రహ్మాజీ నివసిస్తోన్న ప్రాంతం కూడా ఉంది. ఆయన ఇంటి వద్ద ప్రాంతం చెరువును తలపించింది. ఈ ఫొటోలను బ్రహ్మాజీ ట్విట్టర్‌లో షేర్ చేస్తూ.. ‘‘ఇది మా ఇంటి పరిస్థితి.. ఓ మోటరు బోటు కొనాలనుకుంటున్నా.. దయచేసి ఏదైనా మంచి పడవ గురించి సలహా ఇవ్వండి’’ అని పేర్కొన్నారు. దీంతో ఈ మెసేజ్ చూసిన నెటిజన్లకు చిర్రెత్తుకొచ్చింది. బ్రహ్మాజీపై ట్రోలింగ్‌కి దిగారు. హైదరాబాద్ వరద పరిస్థితులు, కష్టాల గురించి నీ లాంటి సెలెబ్రిటీలు జోకులు వేయడం, సెటైరికల్ కామెంట్స్ చేయడం సరికాదంటూ ఫైర్ అయ్యారు. అంతేనా.. ‘‘కోటి ఆశలతో హైదరాబాద్ వచ్చి ఉంటావ్. కోట్ల రూపాయలు సంపాదించావ్. కోతి పనులు చేసి ఇజ్జత్ తీసుకోకు.. బతుకునిచ్చిన భాగ్యనగరం బాధలో ఉన్నప్పుడు కొంచెం బాధ్యతగా మాట్లాడటం మంచిది’’.. ఇలా ఎవరికి తోచినట్టు వాళ్లు బ్రహ్మాజీపై దుమ్ముత్తిపోశారు. అందుకే, ఈ టార్చర్ తట్టుకోలేక ఆయన ట్విట్టర్‌ను వీడారు. అయితే, ఈ విషయంలో బ్రహ్మాజీ చాలా అప్సెట్ అయినట్టు సమాచారం. అసలు ఎవరినీ కించపరచాలనే, బాధపెట్టాలనే ఉద్దేశం తనకు లేదని తెలిసినవాళ్ల దగ్గర బ్రహ్మాజీ వాపోయారట. ‘‘నేను, నా భార్య, నా కొడుకు కారులో ఇంటికి వస్తున్నాం. అక్కడ మొత్తం నడుము లోతు నీళ్లు. ప్రవాహం కూడా చాలా ఎక్కువగా ఉంది. ఆ నీటిలో కారులో వెళ్లడం ప్రమాదమని మేం భావించాం. దగ్గరలోని అపార్ట్‌మెంట్‌లో ఉండేవాళ్లను రిక్వెస్ట్ చేసి అక్కడ కార్ పార్క్ చేశాం. అక్కడి నుంచి నడుచుకుంటూ ఇంటికి వెళ్లాలని మేం నిర్ణయించుకున్నాం. కొంత మంది మాకు సాయం చేశారు. ఆ ప్రవాహంలోనే జాగ్రత్తగా ఇంటికి చేరాం. బేస్‌మెంట్ మొత్తం చెరువులా మారింది. ఆ పరిస్థితులో ఆ ఫొటో తీసి చిన్న జోక్ చేశాను. ఒక పడవ కొనుక్కోవాల్సిందే అని అన్నాను. ఇంత రాద్దాంతం చేస్తారని అనుకోలేదు’’ అని బ్రహ్మాజీ అన్నారట.

from Telugu Movie News | Movie News in Telugu | Movie Gossips in Telugu https://ift.tt/3obJLjB
v