మహేష్ బాబును అలా సంబోధించిన తమన్.. బలిసిందా అంటూ ఫ్యాన్స్ ఫైర్

సంగీత దర్శకుడు ఎస్.తమన్‌పై సూపర్ స్టార్ అభిమానులు కొంత మంది తీవ్ర ఆగ్రహం వ్యక్తం చేస్తున్నారు. ట్విట్టర్ వేదికగా తమన్‌పై తిట్ల దండకాన్ని అందుకున్నారు. ‘బలిసిందా’ అంటూ దుర్భాషలాడుతున్నారు. దీనికి కారణం మహేష్‌ను ‘బ్రదర్’ అని సంబోధించడమే. మహేష్ బాబును ‘సర్’ అని పిలవకుండా ‘బ్రదర్’ అని సంబోధించడం వల్ల సూపర్ స్టార్ ఫ్యాన్స్‌కు ఎక్కడిలేని కోపం వచ్చేసింది. ‘మహేష్ బాబుని బ్రదర్ అని పిలిచేటంత వాడివి అయిపోయావా.. సర్ అని పిలు’ అని తమన్‌ను ట్విట్టర్ ద్వారా హెచ్చరిస్తున్నారు కొంత మంది మహేష్ ఫ్యాన్స్. ఆగస్టు 9న మహేష్ బాబు తన 45వ పుట్టినరోజును జరుపుకోబోతున్నారు. మహేష్ బర్త్‌డే అంటే ఆయన అభిమానులకు పండుగ లాంటిది. కచ్చితంగా తెలుగు రాష్ట్రాల్లో చాలా చోట్ల ఫ్యాన్స్ అసోసియేషన్ల ఆధ్వర్యంలో పుట్టినరోజు వేడుకలు జరుగుతాయి. ప్రస్తుత కరోనా పరిస్థితుల్లో ఇలా సామూహిక వేడుకలు నిర్వహించడం మంచిది కాదు. అందుకే, తన పుట్టినరోజు సందర్భంగా అభిమానులంతా సామూహిక వేడుకలకు దూరంగా ఉండాలని మహేష్ బాబు సూచించారు. ఈ మేరకు శుక్రవారం మహేష్ బాబు ట్వీట్ చేశారు. Also Read: ‘‘ప్రియమైన అభిమానులకు, మీరందరూ నాకు తోడుగా ఉండడం నా అదృష్టం. నా పుట్టినరోజు, ఒక ప్రత్యేకమైన రోజుగా గుర్తుండాలని మీరు చేస్తున్న మంచి పనులకు చాలా సంతోషంగా ఉంది. అందుకు మీ అందరినీ అభినందిస్తున్నాను. ప్రస్తుతం కరోనాతో మనమందరం చేస్తున్న ఈ యుద్ధంలో సురక్షితంగా ఉండడం అనేది అన్నిటికంటే ముఖ్యం. నా పుట్టిన రోజున అభిమానులందరూ సామూహిక వేడుకలకు దూరంగా ఉండి క్షేమంగా ఉండాలని కోరుకుంటున్నాను’’ అని ట్వీట్‌లో మహేష్ బాబు పేర్కొన్నారు. ఈ ట్వీట్‌ను రీట్వీట్ చేసిన తమన్.. ‘‘గొప్ప నిర్ణయం బ్రదర్’’ అని పేర్కొన్నారు. అయితే, మహేష్ బాబును తమన్ బ్రదర్ అని పిలవడం కొంత మంది అభిమానులకు కోపం తెప్పించింది. తమన్ మొదట్లో మహేష్‌ను సర్ అని పిలిచేవాడని.. ఇప్పుడు అతడికి బలిసిందని, అందుకే బ్రదర్ అని సంబోధిస్తున్నాడంటూ తిట్టిపోస్తున్నారు. అయితే, కొంత మంది మహేష్ అభిమానులు మాత్రం దీన్ని తప్పుబడుతున్నారు. ‘బ్రదర్’ అనడంలో తప్పేముందని ప్రశ్నిస్తున్నారు. మహేష్‌ను అభిమానులంతా ప్రేమగా ‘అన్న’ అని పిలుచుకుంటారని.. అలాగే, తమన్ ఇంగ్లిష్‌లో బ్రదర్ అని అన్నారని సర్దిచెబుతున్నారు. కాగా, మహేష్ బాబు ‘సర్కారి వారి పాట’ సినిమాకు తమన్ సంగీతం సమకూరుస్తున్నారు.

from Telugu Movie News | Movie News in Telugu | Movie Gossips in Telugu https://ift.tt/30CiLA9
v