విషాదం.. రావి కొండల రావు ఇకలేరు

ప్రముఖ నటుడు మరణించారు. నటుడు, దర్శకుడు, రచయిత, నాటకం.. సినీమా.. టీవీ.. పత్రికలు.. మిమిక్రీ ఇలా అన్ని రంగాలలోనూ విశేష అనుభవం రావి కొండలరావు మంగళవారం నాడు (జూలై 28) గుండెపోటుతో మరణించారు. ప్రస్తుతం ఆయన వయసు 88 సంవత్సరాలు. హైదరాబాద్‌లోని వివేకానంద ఆసుపత్రిలో రావి కొండలరావు తుదిశ్వాస విడిచారు. సినీ, సాహిత్య, సాంస్కృతిక, కళారంగాల్లో విశేష అనుభవం సంపాదించి నిరాడంబరంగా జీవితం గడిపిన రావి కొండలరావు మృతితో టాలీవుడ్‌లో విషాదఛాయలు అలముకున్నాయి. ఆయన మృతిపై టాలీవుడ్ పరిశ్రమ దిగ్భ్రాంతిని వ్యక్తం చేసింది. 1932, ఫిబ్రవరి 11 న శ్రీకాకుళం లో జన్మించిన రావి కొండలరావు, ఆరు దశాబ్దాల సుదీర్ఘ సినీ ప్రస్థానంలో 600లకు పైగా సినిమాలలో తన విలక్షణ నటనతో ప్రేక్షకులను అలరించారు... రావి కొండల రావు చిన్నప్పటి నుంచి నాటకాలు వేస్తూ రచనలు చేసేవారు. 1965లో చదువు పూర్తి చేసి.. ఆనందవాణి పత్రికలో సబ్ ఎడిటర్‌గా శ్రీశ్రీ, ఆరుద్రలతో కలిసి పనిచేశారు. అనంతరం కొడవటిగంటి కుటుంబరావు, నండూరి రామమోహనరావు, జలసూత్రం రుక్మిణీనాథశాస్త్రి మొదలైనవారితో పరిచయాలు ఏర్పరచుకున్నారు. అప్పుడే ఆంధ్రపత్రికలో కొండల రావు కథలు అచ్చు అయ్యేవి. రావి కొండలరావు నాటకాలు, రావి కొండలరావు కథలు, రావి కొండలరావు నాటికలు, బ్లాక్ అండ్ వైట్, మల్లీశ్వరి నవలా రూపం, మాయా బజార్ నవలా రూపం, షావుకారు నవలా రూపం ఇలా ఎన్నో రచనలు చేశారు రావి కొండలరావు. ఇక నాటకరంగం నుంచి ‘దాగుడు మూతలు’ సినిమాతో నటుడిగా మారారు. రాముడు భీముడు, తేనెమనసులు, ప్రేమించి చూడు లాంటి ఎన్నో విజయవంతమైన చిత్రాల్లో నటించారు. చివరిగా ఆయన 365 డేస్ చిత్రంలో నటించారు. రావి కొండలరావు భార్య రాధా కుమారి కూడా ఆయనతో కలిసి అనేక సినిమాల్లో నటించారు. ఆమె 2012లో మరణించారు. ఈ ఇద్దరూ కలిసి ఏకంగా 150పైగా సినిమాల్లో భార్యాభర్తలుగా కలిసి నటించారు. ‘భైరవద్వీపం’, ‘కృష్ణార్జున యుద్ధం’ సినిమాలకు రావి కొండలరావు సహ నిర్మాతగా వ్యవహరించారు.

from Telugu Movie News | Movie News in Telugu | Movie Gossips in Telugu https://ift.tt/305Asrn
v