కీర్తి సురేష్ ‘పెంగ్విన్’ టీజర్: సైకో థ్రిల్లర్.. తల్లి పీడకల నిజమైంది!

‘మహాన‌టి’ సినిమాతో ప్రతిభావంతురాలైన నటిగా గుర్తింపు తెచ్చుకున్నారు కీర్తి సురేష్. ఆ సినిమాతో జాతీయ ఉత్తమ నటి పురస్కారాన్ని కూడా పొందారు. ‘మహానటి’తో స్థాయి పెరిగింది. ఈ సినిమా తరవాత కీర్తి ఆచితూచి పాత్రలను ఎంపిక చేసుకుంటున్నారు. కేవలం హీరోయిన్ పాత్రలే కాకుండా తన పాత్రకు ప్రాధాన్యమున్న లేడీ ఓరియెంటెడ్ సినిమాలను కూడా అంగీకరిస్తున్నారు. ఇలాంటి సినిమాల్లో ‘పెంగ్విన్’ ఒకటి. ఇది ద్విభాషా చిత్రం. తెలుగు, తమిళ భాషల్లో ఏకకాలంలో రూపొందింది. ఈ రెండు భాషలతో పాటు మలయాళంలోకి కూడా ఈ సినిమాను అనువాదం చేశారు. ‘పేట’ దర్శకుడు కార్తిక్ సుబ్బరాజ్ సమర్పణలో రూపొందిన ఈ చిత్రం వేసవిలో విడుదల కావాల్సి ఉంది. అయితే, లాక్‌డౌన్ కారణం సినిమా విడుదల కుదరలేదు. దీంతో ఈ సినిమాను నేరుగా అమెజాన్ ప్రైమ్ వీడియోలో విడుదల చేస్తున్నారు. తెలుగు, తమిళం, మలయాళ భాషల్లో జూన్ 19న ఈ చిత్రం అమెజాన్ ప్రైమ్‌లో విడుదల అవుతోంది. అయితే, ప్రచారంలో భాగంగా సోమవారం (జూన్ 8న) టీజర్‌ను విడుదల చేశారు. నలుగురు స్టార్ హీరోయిన్లు ఈ చిత్ర టీజర్‌ను లాంచ్ చేయడం విశేషం. Also Read: స్టార్ హీరోయిన్లు తాప్సీ ప‌న్ను, స‌మంత‌, మంజు వారియ‌ర్, త్రిష ‘పెంగ్విన్’ టీజ‌ర్‌ని త‌మ ట్విట్టర్ ఖాతాల ద్వారా విడుద‌ల చేశారు. టీజర్‌ చూస్తుంటే ఇదో సైకో థ్రిల్లర్ అని అర్థమవుతోంది. అంతేకాదు, ఇదొక తల్లి కథ. ‘తల్లికి వచ్చిన పీడకల నిజమైంది’ అని కీర్తి సురేష్ తన ట్వీట్‌లో పేర్కొన్నారు. జూన్ 11న విడుదలయ్యే ట్రైలర్‌తో సినిమా గురించి మరిన్ని ఆసక్తికర విషయాలు తెలియనున్నాయి. ‘రాక్షసుడు’ సినిమాలో క్రిస్టోఫర్ పాత్ర మాదిరిగా ఈ సినిమాలోనూ చార్లీ చాప్లిన్ వేషంలో ఒక సైకో ఉన్నాడు. వాడిని కూడా టీజర్‌లో పరిచయం చేశారు. కాగా, ఈ సినిమాకు ఈశ్వర్ కార్తిక్ దర్శకత్వం వహించారు. కార్తికేయన్ సంతానం, కాల్ రామన్, ఎస్.సోమసేగెర్, కళ్యాణ్ సుబ్రమణియన్ సంయుక్తంగా ఈ చిత్రాన్ని నిర్మించారు. సంతోష్ నారాయణన్ సంగీతం సమకూర్చారు. టీజర్‌లో సంతోష్ నారాయణన్ సంగీతం కూడా ప్రధాన ఆకర్షణగా కనిపిస్తోంది. ఆయన అద్భుతమైన బ్యాక్‌గ్రౌండ్ స్కోర్ ఇచ్చినట్టు స్పష్టమవుతోంది.

from Telugu Movie News | Movie News in Telugu | Movie Gossips in Telugu https://ift.tt/2MFvqdK
v