లాక్‌డౌన్ ఎఫెక్ట్: సొంతూరులో ఆవు పాలు పితుకుతోన్న కమెడియన్

కరోనా వైరస్ విజృంభిస్తోన్న నేపథ్యంలో కేంద్ర ప్రభుత్వం 21 రోజులపాటు దేశ వ్యాప్తంగా లాక్‌డౌన్ విధించడంతో ప్రజలంతా ఇళ్లకే పరిమితమయ్యారు. సినిమా షూటింగ్‌లు కూడా ఆగిపోవడంతో నటీనటులతో పాటు ఇండస్ట్రీలో పనిచేసేవారంతా ఇళ్లలోనే తమ కుటుంబాలతో గడుపుతున్నారు. అయితే, తమిళ నటుడు ధీనా తన సొంతూరు తిరువూర్ వెళ్లిపోయారు. అక్కడ తన ఇంట్లోని ఆవులకు పాలుపితుకుతున్నారు. ఆవులకు పాలు పితుకుతోన్న వీడియోను ఆయన తాజాగా ఇన్‌స్టాగ్రామ్‌లో పోస్ట్ చేశారు. ఈ వీడియోలో ఆయన చాలా సింపుల్‌గా కనిపిస్తున్నారు. ‘కలక్క పోవాతు యారు’ అనే టెలివిజన్ షోతో ధీనా తమిళనాట బాగా పాపులర్ అయ్యారు. ధనుష్ దర్శకుడిగా మారి తెరకెక్కించిన తొలి సినిమా ‘పా పాండి’ ద్వారా ధీనా నటుడిగా వెండితెరకు పరిచయమయ్యారు. ఆ తరవాత ‘తుంబా’, ‘ఖైదీ’ సినిమాలతో పాపులారిటీ సంపాదించారు. కార్తి హీరోగా నటించిన ‘ఖైదీ’ సినిమా తెలుగులోనూ బ్లాక్ బస్టర్ హిట్ అయ్యింది. ఈ సినిమాలో కార్తితో పాటు లారీలో ట్రావెల్ చేసే కుర్రాడే ధీనా. ప్రస్తుతం నటుడిగా, కమెడియన్‌గా తమిళంలో బాగా రాణిస్తున్నారు. దళపతి విజయ్ లేటెస్ట్ మూవీ ‘మాస్టర్’లో ధీనా నటించారు. ఇటీవల చెన్నైలో జరిగిన ‘మాస్టర్’ ఆడియో రిలీజ్ ఫంక్షన్ తన స్పీచ్‌తో అదరగొట్టారు ధీనా. ఆ వీడియో విపరీతంగా వైరల్ అయ్యింది. ఇప్పుడు మరో వీడియోతో ధీనా ఆకట్టుకున్నారు. ఒక సాధారణ రైతు కుటుంబానికి చెందిన ధీనా.. యాక్టర్‌గా పాపులారిటీ సంపాదించినా సింపుల్‌గా తనకు చేతనైన పనిని చేయడం నెటిజన్లను కట్టిపడేస్తోంది. ఇదిలా ఉంటే, ‘మాస్టర్’ సినిమా ఏప్రిల్‌లో విడుదల చేయాలని భావించారు. కానీ, లాక్‌డౌన్‌ను ఇంకా పొడిగించే అవకాశం ఉన్నందున ఈ సినిమా ఇప్పట్లో ప్రేక్షకుల ముందుకు వచ్చే అవకాశం లేదు. ప్రస్తుతమున్న పరిస్థితి చక్కబడిన తరవాతే విడుదల ఉంటుంది. ఈ సినిమాను తెలుగులో నిర్మాత మహేష్ ఎస్. కోనేరు విడుదల చేస్తున్నారు. ఈ చిత్రంలో విజయ్ సేతుపతి ప్రతినాయకుడిగా నటించారు. మాళవిక మోహనన్ హీరోయిన్. లోకేష్ కనకరాజ్ దర్శకత్వం వహించారు. అనిరుధ్ సంగీతం సమకూర్చారు.

from Telugu Movie News | Movie News in Telugu | Movie Gossips in Telugu https://ift.tt/2V6nwxN
v