జట్కా రాజు కొరడా విసిరితే ఎలాంటోళ్లకైనా సుర్రు సుమ్మైపోద్ది. అందుకే, బాక్సాఫీసుకు కూడా సుర్రు సుమ్మైపోయింది. కలెక్షన్ల వర్షం కురిపించింది. యువ సామ్రాట్ అక్కినేని నాగార్జున హీరో నటించిన చిత్రం ‘ఘరానా బుల్లోడు’. ఈ సినిమాలో జట్కా రాజు పాత్రలో ఆయన కనిపించారు. అప్పట్లో స్టార్ హీరోలకు ఒక్కో సినిమాలో ఒక్కో ఫేమస్ డైలాగు ఉండేది. ఆ హీరో మ్యానరిజంకు తగ్గట్టు ఆ డైలాగ్ పెట్టేవారు. ‘ఘరానా బుల్లోడు’లో నాగార్జునకు అంతే.. ‘సుర్రు సుమ్మైపోద్ది’ డైలాగ్ను పెట్టారు. ఇది జనాల్లోకి బాగా వెళ్లిపోయింది. దర్శకేంద్రుడు కె.రాఘవేంద్రరావు దర్శకత్వం వహించిన ఈ చిత్రం అప్పట్లో 20 కేంద్రాల్లో 100 రోజులు పూర్తిచేసుకుంది. ఆర్కే ఫిలింస్ అసోసియేట్స్ బ్యానర్పై కె.కృష్ణమోహనరావు ఈ చిత్రాన్ని నిర్మించారు. నాగార్జున సరసన రమ్యకృష్ణ, ఆమని హీరోయిన్లుగా నటించారు. జయంతి, సుధ, మురళీ మోహన్, కోట శ్రీనివాసరావు, బ్రహ్మానందం, సుధాకర్, తనికెళ్ల భరణి, మహేష్ ఆనంద్, శ్రీహరి, మాడా, ధర్మవరపు సుబ్రహ్మణ్యం, మాగంటి సుధాకర్ ఇతర ముఖ్య పాత్రలు పోషించారు. నూతన ప్రసాద్ అతిథి పాత్రలో కనిపించారు. ఈ సూపర్ హిట్ సినిమా విడుదలై నేటికి 25 సంవత్సరాలు పూర్తయ్యింది. 1995 ఏప్రిల్ 27న ‘ఘరానా బుల్లోడు’ చిత్రం విడుదలైంది. విజయేంద్ర ప్రసాద్ ఈ సినిమాకు కథ అందించారు. ఎం.ఎం.కీరవాణి సంగీత దర్శకుడు. ఆయన స్వరపరిచిన పాటలన్నీ అప్పట్లో సూపర్ హిట్. ఇప్పటికీ చాలా మంది ఈ సినిమాలోని పాటలను వింటూనే ఉంటారు. ‘భీమవరం బుల్లోడా పాలు కావాలా మురిపాలు కావాలా’, ‘సై సై సయ్యారే’, ‘చుక్కల్లో తలుకులా’, ‘వంగి వంగి దండమెట్టు’ పాటలు బాగా పాపులర్. ఈ సినిమాలోని పాటలను ఎస్.పి.బాలసుబ్రహ్మణ్యం, మనో, చిత్ర ఆలపించారు. అప్పట్లో ఈ చిత్ర శతదినోత్సవ వేడుకలను అభిమానులో నిర్వహించారు. 1995 ఆగస్టు 4న విజయవాడలో అక్కినేని అభిమాన సంఘం ఆధ్వర్యంలో శతదినోత్సవ వేడుకలు జరిగాయి.
from Telugu Movie News | Movie News in Telugu | Movie Gossips in Telugu https://ift.tt/2W0cpqS
v
No comments:
Post a Comment