‘ఓ పిట్టకథ’ సినిమా రివ్యూ

టాలీవుడ్‌లో వచ్చే ప్రతి చిన్న సినిమాకు హైప్ క్రియేట్ అవ్వదు. చిన్న సినిమా జనాల్లోకి వెళ్లాలంటే దానికి బోలెడంత ప్రచారం అవసరం. అది కూడా ప్రేక్షకులను ఆకర్షించేలా వైవిధ్యంగా ఉండాలి. లేదంటే ప్రేక్షకుల్లో మంచి ఇమేజ్ ఉన్న సూపర్ స్టార్లతో ప్రచారం చేయించాలి. నటుడు బ్రహ్మాజి ఈ రెండో దారిని ఎంచుకున్నారు. తన కుమారుడు సంజయ్ రావును ప్రేక్షకులకు పరిచయం చేయడానికి ‘ఓ పిట్టకథ’ అనే చిన్న సినిమాను ఎంపిక చేసుకున్న బ్రహ్మాజి.. ప్రచారానికి మాత్రం సూపర్ స్టార్లను వాడుకున్నారు. మెగాస్టార్ చిరంజీవి ఈ చిత్ర ప్రీ రిలీజ్ ఈవెంట్‌కు వచ్చి బోలెడంత ప్రచారం చేశారు. ఇక యంగ్ టైగర్ ఎన్టీఆర్ ఈ సినిమా గురించి ట్వీట్ చేయడం కూడా ప్లస్ అయ్యింది. మొత్తానికి ఓ మోస్తరు అంచనాల నడుమ ఈ చిత్రం శుక్రవారం ప్రేక్షకుల ముందుకు వచ్చింది. కథ ‘ఓ పిట్టకథ’.. టైటిల్‌కు తగ్గట్టుగానే స్టోరీలైన్ చాలా సింపుల్‌గా ఉంది. వెంకటలక్ష్మి సినిమా థియేటర్ యజమాని వీర్రాజు తన ఒక్కగానొక్కకూతురు వెంకటలక్ష్మి (నిత్యాశెట్టి)ని అల్లారుముద్దుగా పెంచుతాడు. తల్లిలేని పిల్ల కావడంతో కూతురికి ఎలాంటి లోటు రానివ్వడు. వీర్రాజు థియేటర్‌లో పనిచేసే ప్రభు (సంజయ్ రావు), వెంకటలక్ష్మి ప్రేమించుకుంటారు. ఈ విషయం వీర్రాజుకు తెలీదు. ఈ సమయంలో అకస్మాత్తుగా చైనా నుంచి వీర్రాజు చెల్లెలి కొడుకు క్రిష్ (విశ్వంత్) ఊడిపడతాడు. మరదల్ని పెళ్లిచేసుకుంటానని మేనమామను ఒప్పిస్తాడు. ఈ క్రమంలో వెంకటలక్ష్మి కనిపించకుండా పోతుంది. అసలు వెంకటలక్ష్మి ఏమైంది? ప్రభు ఏమైనా చేశాడా? ఈ ట్రైయాంగిల్ లవ్ స్టోరీ ఎలా ముగిసింది? అనేదే సినిమా. రివ్యూ దర్శకుడు చెందు ముద్దు తీసుకున్న స్టోరీ లైన్ చిన్నదే అయినా దాన్ని స్క్రీన్‌ప్లే‌తో బాగా నడిపించారు. ముఖ్యంగా సెకండాఫ్ సినిమాకు బలం. ఫస్టాఫ్ పెద్ద థ్రిల్లింగ్‌గా అనిపించదు. కథ చాలా నెమ్మదిగా సాగుతుంది. నిజం చెప్పాలంటే మనకు విసుగొస్తుంది. కానీ, ఇంటర్వెల్ నుంచి సినిమా రూటు మారుతుంది. హైవే ఎక్కుంది. ట్విస్టుల మీద ట్విస్టులు మనల్ని ఆశ్చర్యానికి గురిచేస్తాయి. క్రిష్ ఎత్తులకు ప్రభు వేసే పైఎత్తులు మంచి థ్రిల్‌ను ఇస్తాయి. ఫస్టాఫ్ చూసినప్పుడు కాస్త నిరాశపడినా సెకండాఫ్ సినిమాను నిలబెట్టేసిందనే ఫీలింగ్‌తో థియేటర్‌ నుంచి బయటికి వస్తాం. సినిమా క్లైమాక్స్‌కు వచ్చేంత వరకు ఎవరు విలన్, ఎవరు హీరో అనే పాయింట్‌ను ప్రేక్షకుడు పట్టుకోలేడు. అంత బాగా లాక్కొచ్చారు దర్శకుడు. సినిమాకు ఏదైనా లోపం ఉందంటే అది వినోదం. సినిమా మరీ ఫ్లాట్‌గా వెళ్లిపోవడం కాస్త బోరింగ్‌గా అనిపిస్తుంది. మధ్యమధ్యలో కామెడీ జత చేసినా అది సరిగ్గా పండలేదు. అయితే, థియేటర్‌లో సినిమా మొదలుకావడానికి ముందు వచ్చే రాహుల్ డ్రావిడ్ యాడ్‌తో ముడిపెట్టి వెంకటలక్ష్మి, ప్రభు పాత్రలపై చిత్రీకరించిన కామెడీ సీన్ బాగా పేలింది. ఇలా సినిమా మొత్తం కామెడీ వర్కౌట్ అయ్యుంటే మరింత ఎంటర్‌టైనింగ్‌గా అనిపించేది. అయినప్పటికీ పెద్దగా వచ్చిన ఇబ్బందేమీ లేదు. థ్రిల్లర్స్ ఇష్టపడే ప్రేక్షకులకు ఇది పర్ఫెక్ట్ మూవీ. నటీనటుల విషయానికి వస్తే.. బ్రహ్మాజి కుమారుడు సంజయ్ రావు పర్వాలేదనిపించారు. ఇది తొలి సినిమానే అయినా కొన్ని సన్నివేశాల్లో తన మార్క్ చూపించారు. విశ్వంత్ తన పాత్రకు పూర్తి న్యాయం చేశారు. క్యారెక్టర్‌లో వేరియేషన్స్‌ను బాగా చూపించారు. ఇక హీరోయిన్ నిత్యాశెట్టి క్యూట్ యాక్టింగ్‌తో కట్టిపడేసింది. కూతురుగా, ప్రేయసిగా, బావకు మరదలిగా తనదైన నటనతో ఆకట్టుకుంది. పోలీస్ ఇన్‌స్పెక్టర్‌గా బ్రహ్మాజి నటన గురించి కొత్తగా చెప్పేదిముంది. ఇలాంటి పాత్రలు ఆయనకు కొట్టినపిండి. ఇతర నటీనటులంతా తమ పాత్రల పరిధిమేర నటించారు. టెక్నికల్‌గా.. ఈ సినిమా టెక్నికల్‌గా చాలా రిచ్‌గా ఉంది. ముఖ్యంగా సునీల్ కుమార్ సినిమాటోగ్రఫీ చాలా బాగుంది. అరకు పేరుతో చూపించిన ఊటీ అందాలను తెరపై అద్భుతంగా ఆవిష్కరించారు. అలాగే, కాకినాడ చుట్టూ ఉన్న పల్లె అందాలను, బీచ్ సోయగాలను కూడా అంతే బాగా చూపించారు. ముఖ్యంగా ఊటీలో డ్రోన్ షాట్లు చాలా బాగున్నాయి. ఇక ప్రవీణ్ లక్కరాజు నేపథ్య సంగీతం మరో ప్రధాన ఆకర్షణ. అలాగే, ఆయన స్వరపరిచిన రెండు పాటలు కూడా బాగున్నాయి. భవ్య క్రియేషన్స్ నిర్మాణ విలువలు బాగున్నాయి. చివరిగా.. ‘ఓ పిట్టకథ’.. ట్విస్టులతో ఆశ్చర్యపరిచే ఒక మంచి రొమాంటిక్ థ్రిల్లర్

from Telugu Movie News | Movie News in Telugu | Movie Gossips in Telugu https://ift.tt/2PPN2FM
v