బిత్తిరి సత్తిని ఇమిటేట్ చేసిన చిరంజీవి.. ఫప్ఫన్నం తిన్నట్టుందట..!!

న్యూస్ ఛానెల్స్‌లో వచ్చే యాంకర్లలో బిత్తిరి సత్తిది డిఫరెంట్ స్టైల్. ‘తీన్మార్ వార్తలు’తో రెండు తెలుగు రాష్ట్రాల్లో బాగా పాపులర్ అయిన కావలి రవి అలియాస్ బిత్తిరి సత్తి ప్రస్తుతం సినిమాల్లో కూడా నటిస్తున్నారు. అయితే, ‘తీన్మార్ వార్తలు’ చేసేటప్పుడు సత్తికి సావిత్రి జోడి. ఇద్దరూ కలిసి రచ్చరచ్చ చేసేవారు. సావిత్రి అంటే బిగ్ బాస్ సీజన్ 3 కంటెస్టెంట్ శివజ్యోతి. ప్రస్తుతం తీన్మార్ వార్తలను వదిలిపెట్టిన సత్తి, శివజ్యోతి ఎవరి దారి వారు చూసుకున్నారు. కానీ, వారిద్దరూ కలిసి పనిచేసిన రోజులను ఒక్కసారి మెగాస్టార్ చిరంజీవి మళ్లీ గుర్తుచేశారు. ఆదివారం రాత్రి బిగ్ బాస్ సీజన్ 3 గ్రాండ్ ఫినాలే జరిగిన విషయం తెలిసిందే. ఈ ఫినాలేకు మెగాస్టార్ చిరంజీవి ముఖ్య అతిథిగా విచ్చేసి విజేత రాహుల్‌కు టైటిల్‌ను అందజేశారు. అయితే, గ్రాండ్ ఫినాలే ఎపిసోడ్ అంతా ఒక ఎత్తైయితే.. చిరంజీవి ఎంట్రీ ఇచ్చిన తరవాత జరిగిన హంగామా మరో ఎత్తు. అంత అద్భుతంగా వినోదాన్ని పంచారు చిరంజీవి. తనలోని హాస్యరసాన్నంతా పండించారు. నిజం చెప్పాలంటే ఈ గ్రాండ్ ఫినాలేకు హైలైట్ చిరంజీవి. హౌస్ నుంచి ఎలిమినేట్ అయిన కంటెస్టెంట్లను తానే స్వయంగా పరిచయం చేసుకుంటూ పండించిన కామెడీ ప్రతి ఒక్కరినీ నవ్వించింది. ఈ క్రమంలో శివజ్యోతి దగ్గరకు వచ్చేసరికి చిరంజీవిని బిత్తిరి సత్తి ఆవహించారు. ఆయన స్టైల్లో చేతి వేళ్లు వంకరగా పెట్టి.. ‘ఫ’ భాషలో మాట్లాడుతూ నవ్వించారు చిరంజీవి. మెగాస్టార్ సడెన్‌గా బిత్తిరి సత్తిగా మారడంతో శివజ్యోతి కూడా సంభ్రమాశ్చర్యానికి గురైంది. ‘‘తెలంగాణ మొత్తానికి జ్యోతక్క’’ అంటూ చిరంజీవికి శివజ్యోతిని నాగార్జున పరిచయం చేశారు. ‘‘హాయ్ సార్.. బాగున్నారా’’ అని చిరంజీవిని శివజ్యోతి అడగగానే.. ‘‘సాలా బాగున్నాననమ్మా.. సాలా హ్యాఫీగా ఉందమ్మ నిన్ను ఈవాళ కలవటం. ఎంత హ్యాఫీ అంటే ఫప్ఫన్నం తిన్నట్టుంది ఈవాళ’’ అని చిరంజీవి బిత్తిరి సత్తిలా మాట్లాడారు. ఈ సమయంలో అక్కడంతా అరుపులు, కేకలు. శివజ్యోతి అయితే ఆనందంతో గెంతులేసింది. ‘‘థాంక్యూ సార్.. నేను నిద్రపోను ఈ రాత్రింక’’ అని శివజ్యోతి సంతోషంగా చెప్పింది. వెంటనే చిరంజీవి ‘‘ఏడవొద్దు’’ అంటూ కామెడీ చేశారు. మొత్తం మీద ఓ పది నిమిషాల పాటు చిరంజీవి బోలెడంత వినోదాన్ని పంచారు. ఇదిలా ఉంటే, మెగాస్టార్ చిరంజీవి తనను ఇమిటేట్ చేయడం చూసి బిత్తిరి సత్తి ఆనందంతో ఉబ్బితబ్బిబ్బవుతున్నారు. తనలా చిరంజీవి వేళ్లు వంకర పెట్టిన ఫొటోను తన వాట్సాప్ స్టేటస్‌లో బిత్తిరి సత్తి పెట్టుకున్నారు. అలాగే, చిరంజీవికి ఆయన ధన్యవాదాలు తెలుపుకున్నారు.

from Telugu Movie News | Movie News in Telugu | Movie Gossips in Telugu https://ift.tt/2NdWqSR
v