దహించిపోతోన్న ‘లంగ్స్ ఆఫ్ ది ప్లానెట్’.. మహేష్, బన్నీ ఆవేదన

ప్రపంచంలోనే అతిపెద్ద అడవి అయిన అమెజాన్ రెయిన్ ఫారెస్ట్ గడిచిన మూడు వారాలుగా తగలబడిపోతోంది. బ్రెజిల్‌లోని అమెజాన్ అడవుల్లో మొదలైన ఈ కార్చిచ్చు అంతకంతకు వ్యాప్తి చెందుతూ దహించివేస్తోంది. ఈ భూమి మీద 20 శాతం ఆక్సిజన్ అమెజాన్ అడవుల నుంచే వస్తోంది. ఇప్పుడు ఈ అడవి కనీవినీ ఎరుగని రీతిలో దగ్ధమైపోతుండటంతో ప్రపంచ వ్యాప్తంగా మానవాళి తీవ్ర ఆందోళన వ్యక్తం చేస్తోంది. వాస్తవానికి అమెజాన్ అడవిలో కార్చిచ్చు కొత్తేమీ కాదు. అధిక ఉష్ణోగ్రత, తక్కువ మొత్తంలోని ఆర్థ్రత వల్ల అక్కడ కార్చిచ్చు రగులుకోవడం సర్వసాధారణం. అయితే, ఈసారి మాత్రం ఆ కార్చిచ్చు తీవ్ర స్థాయిలో రగిలిపోతోంది. నాసా అంతరిక్షం నుంచి తీసిన ఫొటోల్లో కార్చిర్చు స్పష్టంగా కనిపిస్తోందంటే తీవ్రత ఏ స్థాయిలో ఉందో అర్థంచేసుకోవచ్చు. ఈ ఫొటోలను నాసా సోషల్ మీడియాలో పెట్టడంతో చాలా మందికి తెలిసింది. అమెజాన్ ఫారెస్ట్‌ను కాపాడండంటూ ప్రపంచ వ్యాప్తంగా ఉన్న సామాన్య ప్రజలతో పాటు సెలబ్రిటీలు కూడా వేడుకుంటున్నారు. వీరిలో తెలుగు సినీ ప్రముఖులు కూడా ఉన్నారు. అసలు, భూమికి ఊపిరితిత్తులుగా చెప్పుకునే అమెజాన్ అడవి తగలబడిపోతుంటే మీడియా మాత్రం దాన్ని పట్టించుకోవడంలేదని, కవరేజ్ చాలా తక్కువగా ఉందని కొంత మంది ఆగ్రహం వ్యక్తం చేస్తున్నారు. కాగా, తెలుగు సినీ పరిశ్రమ నుంచి మహేష్‌బాబు, అల్లు అర్జున్, సాయి ధరమ్ తేజ్, హన్సిక, రకుల్ ప్రీత్ సింగ్, అనసూయ తదితరులు ఈ కార్చిచ్చుపై స్పందించారు. తీవ్ర ఆవేదన వ్యక్తం చేశారు. ట్విట్టర్ ద్వారా తమ ఆవేదనను వ్యక్తపరిచారు. ‘‘చాలా బాధాకరమైన వార్త... మన గ్రహానికి ఊపిరితిత్తులుగా పిలుచుకునే, ప్రపంచానికి 20 శాతం ఆక్సిజన్‌‌ను అందించే అమెజాన్ రెయిన్ ఫారెస్ట్ కాలి బూడిదవుతోంది. ఈ గ్రహాన్ని పెద్దగా పట్టించుకోని వారంతా ఇకనైనా మేల్కోవాలి. భూమి ఊపిరితిత్తులు కాలిపోతున్నాయి, జీవవైవిధ్యం ప్రమాదంలో ఉంది. మన భూమిని కాపాడుకోవడానికి మనవంతు కృషి చేయాలి. ఒకడుగు ముందుకు వేసి.. చెట్లను నాటుదాం. ఈ మార్పు ఇంటి నుంచే రావాలి’’ అని మహేష్‌బాబు ట్వీట్ చేశారు. ఇక అల్లు అర్జున్ ఇన్‌స్టాగ్రామ్ ద్వారా స్పందిస్తూ.. ‘‘ప్రపంచంలోని అతి పెద్ద అడవులు, మనకు 20 శాతం ఆక్సిజన్‌ అందించే అడవులు, పది లక్షల మంది అమాయక ప్రజలకు, లక్షలాది వన్యప్రాణులకు ఆధారమైన అడవులు. ఇలా కావడం వల్ల వాతావరణంలో ఎన్నో మార్పులు రాబోతున్నాయి’’ అని పేర్కొన్నారు. ఇలాగే సాయి ధరమ్ తేజ్, హన్సిక, రకుల్ ప్రీత్ సింగ్, అనసూయ కూడా సోషల్ మీడియా ద్వారా వేడుకున్నారు.

from Telugu Movie News | Movie News in Telugu | Movie Gossips in Telugu https://ift.tt/2Z8SY3n
v