చరణ్‌ పిల్లలకు ఆమె పెద్దక్క అవుతుంది.. మంచు లక్ష్మి ఎమోషనల్ పోస్ట్

మెగా పవర్ స్టార్ సినీ పరిశ్రమలో అందరితోనూ ఎంతో స్నేహపూర్వకంగా ఉంటారనేది తెలిసిన విషయమే. అలాగే, మంచు లక్ష్మి కూడా అందరితోనూ చాలా సరదాగా, మిత్రభావంతో మెలుగుతుంటారు. మెగా, మంచు ఫ్యామిలీల మధ్య కూడా మంచి స్నేహపూర్వక వాతావరణం ఉంది. కానీ, ఈ రెండు ఫ్యామిలీలకు చెందిన స్టార్లు కలిసి కెమెరాలకు చిక్కిన సందర్భాలు చాలా తక్కువ. అయితే, తాజాగా మంచు లక్ష్మి కుమార్తె యాపిల్‌తో రామ్ చరణ్ ఫొటో దిగారు. ఈ ఫొటోను లక్ష్మి తన ఇన్‌స్టాగ్రామ్ పేజ్‌లో పోస్ట్ చేశారు. అంతేకాదు, ఈ ఫొటోతో తన పాత జ్ఞాపకాలను గుర్తుచేసుకున్నారు. ‘ఈ ఫొటో నన్ను గతంలోకి తీసుకెళ్లిపోయింది. మీ నాన్నతో తీసుకున్న ఇలాంటి ఫొటోలు నా దగ్గర ఉన్నాయి. ఇప్పుడు ఈ ఫొటో చూస్తుంటే జీవితం ఒక చక్రం లాంటిదని నాకు అర్థమవుతోంది. ఇంత అందమైన ప్రయాణం గురించి ఎంత చెప్పినా తక్కువే. ఇలాగే మరిన్ని సంవత్సరాలు సాగాలి. నీకు పిల్లలు పుడితే వారికి యాపిల్ పెద్దక్క కావాలని నేను కోరుకుంటున్నాను. ఇన్‌స్టా ఫ్యామిలీలోకి స్వాగతం’ అని తన పోస్ట్‌లో మంచు లక్ష్మి పేర్కొన్నారు. లక్ష్మి ఇన్‌స్టాగ్రామ్ పోస్ట్‌కు చరణ్ సతీమణి ఉపాసన స్పందించారు. ‘దిస్ ఈజ్ సో క్యూట్’ అంటూ కామెంట్ పెట్టారు. కాగా, ఇంత వరకు ఫేస్‌బుక్ ద్వారా మాత్రమే అభిమానులకు అందుబాటులో ఉన్న రామ్ చరణ్ ఇటీవల ఇన్‌స్టాగ్రామ్ ఖాతాను తెరిచిన సంగతి తెలిసిందే. తొలి పోస్టును అమ్మ మీద పెట్టి చరణ్ అందరి మనసులు గెలుచుకున్నారు. ప్రస్తుతం ఈ రామ్ చరణ్‌ను ఫాలో అవుతున్న వారి సంఖ్య 5 లక్షలు దాటిపోయింది.

from Telugu Movie News | Movie News in Telugu | Movie Gossips in Telugu https://ift.tt/30yqBrG
v