‘నూటొక్క జిల్లాల అందగాడు’ రివ్యూ.. బట్టతల వినోదం బావుందే!

ఎదుటి వ్య‌క్తి న‌ల్ల‌గా ఉన్నాడ‌నో, కురుచుగా ఉన్నాడ‌నో, క‌ళ్లు.. ఇలా ఏదో ఒక అంశంపై అవ‌హేళ‌న‌గా మాట్లాడ‌టాన్ని బాడీ షేమింగ్ అంటాం. మ‌న చుట్టూ ఈ సంస్కృతి ఎక్కువ‌గా ఉంది. అంతెందుకు మ‌నమూ అలాంటి ప‌రిస్థితులను ఎదుర్కొని ఉండొచ్చు. లేదా మ‌న‌కు తెలిసో తెలియ‌క‌నో మ‌న తోటివారిని అలాంటి మాట‌ల‌తో బాధ పెట్టి ఉండొచ్చు. ఈ బాడీ షేమింగ్ వ‌ల్ల ఎదుటి వ్య‌క్తి కాన్ఫిడెన్స్ దెబ్బ తింటుంది. ఇబ్బంది ప‌డ్డ వ్య‌క్తి ఇత‌రుల ముందుకు వెళ్లాలంటే.. త‌న గురించి వాళ్లేమ‌నుకుంటారోన‌ని సంకోచిస్తాడు. అలా చిన్న వ‌య‌సులోనే బ‌ట్ట‌త‌ల వ‌చ్చిన ఓ యువ‌కుడు ఎలాంటి మానసిక సంఘ‌ర్ష‌ణ‌కు లోన‌య్యాడు. చివ‌ర‌కు త‌న స‌మ‌స్య‌ను ఎలా అధిగ‌మించాడు? అనే అంశాల‌తో న‌టుడు, ద‌ర్శ‌కుడు అవ‌స‌రాల శ్రీనివాస్ రూపొందించిన చిత్ర‌మే `101 జిల్లాల అంద‌గాడు`. ఈ సినిమాకు క‌థ‌ను అందించ‌డ‌మే కాకుండా, హీరోగా న‌టించాడు. మ‌రి ఈ చిత్రం ప్రేక్ష‌కుల‌ను ఏ మేర‌కు ఆక‌ట్టుకుంద‌నే విష‌యం తెలియాలంటే సినిమా క‌థేంటో చూద్దాం... క‌థ‌: గొత్తి సూర్య నారాయ‌ణ అలియాస్ జి.ఎస్‌.ఎన్ (అవ‌సరాల శ్రీనివాస్‌) రియ‌ల్ ఎస్టేజ్ కంపెనీలో సేల్స్ మేనేజ‌ర్‌గా వ‌ర్క్ చేస్తుంటాడు. ముప్పై ఏళ్ల‌కే బ‌ట్ట‌త‌ల వ‌చ్చేస్తుంది. అంద‌రూ త‌న‌ను ఎగ‌తాళి చేస్తార‌ని, న‌వ్వుకుంటార‌ని అనుకుని విగ్గు పెట్టుకుని క‌వ‌ర్ చేసుకుంటూ ఉంటాడు. తను ప‌నిచేస్తున్న కంపెనీలోకి అంజ‌లి(రుహానీ శ‌ర్మ) జాయిన్ అవుతుంది. జి.ఎస్‌.ఎన్ సెన్సాఫ్ హ్యుమ‌ర్ చూసి అత‌నితో స్నేహం చేస్తుంది. ఆ స్నేహం కాస్త ప్రేమ‌గా మారుతుంది. త‌న‌కు బ‌ట్ట‌త‌ల ఉండే విష‌యాన్ని అంజ‌లికి చెప్ప‌కుండా త‌ప్పు చేస్తున్నాన‌నే ఫీలింగ్ జి.ఎస్‌.ఎన్‌కు ఉంటుంది. కానీ.. ఆమె త‌న‌కు దూర‌మైపోతుందని భ‌య‌ప‌డి అస‌లు విష‌యం చెప్ప‌డు త‌ను. అయితే అనుకోకుండా జి.ఎస్.ఎన్‌కు బ‌ట్ట‌త‌ల ఉండే విష‌యం అంజలికి తెలిసిపోతుంది. త‌న‌కు జి.ఎస్‌.ఎన్‌. అబద్దం చెప్పాడ‌ని అంజ‌లికి కోపం వ‌స్తుంది. అత‌నితో మాట్లాడ‌టం మానేస్తుంది. చివ‌ర‌కు జి.ఎస్‌.ఎన్, అంజ‌లి ఎలా క‌లిసిపోయారు? త‌ను అందంగా లేన‌నే ఫీలింగ్‌ను జి.ఎస్‌.ఎన్ ఎలా దూరం చేసుకున్నాడు. అందుకు త‌నేం చేశాడు? అనే విష‌యాలు తెలియాలంటే సినిమా చూడాల్సిందే. విశ్లేష‌ణ‌: మ‌న‌లో చాలా మందికి తెలియ‌ని భ‌యాలు చాలానే ఉంటాయి. వాటిని వివిధ ర‌కాలుగా క‌ప్పిపుచ్చుకునే ప్ర‌య‌త్నాలు చేస్తుంటారు. ఈ క్ర‌మంలో త‌మ ఒరిజినాలిటీని కూడా కోల్పోతుంటారు. ఈ విష‌యాన్ని అవ‌స‌రాల శ్రీనివాస త‌న 101 జిల్లాల అంద‌గాడు చిత్రం ద్వారా వివ‌రించారు. బ‌ట్ట‌త‌ల ఉండే హీరో.. త‌ను అందంగా లేన‌నే విష‌యాన్ని దాచిపెట్టుకోవ‌డం, అదే త‌న‌కు అస‌లు స‌మ‌స్య‌గా మారడం, నిజాన్ని తను అంగీక‌రించ‌డంతో క‌థ ముగుస్తుంది. న‌టుడు, ద‌ర్శ‌కుడు అయిన అవ‌సరాల శ్రీనివాస్..101జిల్లాల అంద‌గాడు చిత్రంలో హీరోగా నటించ‌డ‌మే కాదు.. ఈ సినిమాకు ర‌చ‌యిత కూడా త‌నే. ఒక‌వైపు ఎమోష‌న్స్‌ను, మ‌రో వైపు కామెడీని మిక్స్ చేసి క‌థ‌ను చ‌క్క‌గా రాసుకున్నాడు అవ‌స‌రాల‌. సినిమా స్టార్టింగ్ సీన్ నుంచి ఫ‌స్ట్ సాంగ్ వ‌ర‌కు హీరో క్యారెక్ట‌రైజేష‌న్‌, అత‌ని స‌మ‌స్య‌ను వివ‌రించేశారు. ఇక హీరోయిన్ ఎంట్రీ త‌ర్వాత క‌థ‌లో మ‌రింత ఫ‌న్ యాడ్ అయ్యింది. హీరోయిన్ ఉత్త‌రాది అమ్మాయి అనుకుని హీరో, అత‌ని స్నేహితుడు చేసే కామెడీ.. చివ‌ర‌కు ఆమెకు తెలుగు తెలుసున‌నే విష‌యం తెలియ‌డంతో దాన్ని నిజాయ‌తీగా ఒప్పుకోవ‌డం వంటి సంద‌ర్భాల్లో వ‌చ్చే కామెడీ, అలాగే హీరోయిన్ ఇంటికి హీరో వెళ్లిన‌ప్పుడు విగ్గు ఊడివ‌చ్చేయ‌డం.. దాన్ని క‌వ‌ర్ చేసుకోవ‌డానికి హీరో ప‌డే తిప్ప‌లు ప్రేక్ష‌కుల‌కు న‌వ్వును తెప్పిస్తాయి. అలాగే సెకండాఫ్‌లో పెళ్లి సంద‌ర్భంలో వ‌చ్చే హోటల్ రూమ్ కామెడీ కూడా బావుంది. సంద‌ర్భానుచితంగా వ‌చ్చే డైలాగ్స్ ట‌చింగ్‌గా ఉన్నాయి. ముఖ్యంగా సెకండాఫ్‌లో హీరోకి, త‌న త‌ల్లికి మ‌ధ్య న‌డిచే డిస్క‌ష‌న్‌... అలాగే క్లైమాక్స్‌లో త‌న‌కు బ‌ట్ట‌త‌ల అనే విష‌యాన్ని హీరో స‌భాముఖంగా చెబుతూ ఇచ్చే స్పీచ్.. హీరోకి, త‌న స్నేహితుడికి మ‌ధ్య వ‌చ్చే కొన్ని ఎమోష‌న‌ల్ సీన్స్ ఆక‌ట్టుకుంటాయి. ఇలాంటి కాన్సెప్ట్‌తో హిందీలో బాలా అనే సినిమా వ‌చ్చేసింది. ఆ సినిమాను చూసిన ప్రేక్ష‌కుల‌కు ఈ సినిమా కొత్తగా అనిపించ‌దు. అలాగే ఒకట్రెండు ఎమోష‌న‌ల్ సీన్స్ మిన‌హా.. సినిమాలో ఎమోష‌న‌ల్ పార్ట్ పెద్ద‌గా లేదు. అయితే అవ‌స‌రాల శ్రీనివాస్‌, రుహానీ శ‌ర్మ‌, రోహిణి ఇతర పాత్ర‌ధారులు వారి వారి పాత్ర‌ల‌ను చక్క‌గా క్యారీ చేయ‌డంతో సినిమా ఎక్క‌డా బోర్ కొట్ట‌దు. దర్శకుడు రాచకొండ విద్యాసాగర్.. ఎక్కడా బోర్ ఫీక్ కాకుండా గ్రిప్పింగ్ స్క్రీన్ ప్లే‌తో వినోదాత్మకంగా మలిచారు. శ‌క్తికాంత్ కార్తీక్ సంగీతం అందించిన పాట‌లు, బ్యాగ్రౌండ్ స్కోర్‌, రామ్ సినిమాటోగ్ర‌ఫీ బావున్నాయి. చివ‌ర‌గా... 101 జిల్లాల అంద‌గాడు.. అల‌రిస్తాడు

from Telugu Movie News | Movie News in Telugu | Movie Gossips in Telugu https://ift.tt/3kNxoJP
v