ఫరాన్‌ అఖ్తర్‌ ‘తుఫాన్‌’ రివ్యూ.. వన్ మెన్ షో

ఫరాన్‌ అఖ్తర్‌ సినిమాలు, ఆయన నటన గురించి అందరికీ తెలిసిందే. ఇది వరకే స్పోర్ట్స్ డ్రామా అయిన భాగ్ మిల్కా భాగ్ చిత్రంలో నటించి అందరినీ ఆకట్టుకున్నారు. తాజాగా అంటూ బాక్సర్‌గా ప్రేక్షకుల ముందుకు వచ్చారు. నేడు ఈ చిత్రం అమెజాన్ ప్రైమ్‌లో అందుబాటులోకి వచ్చింది. తుఫాన్‌గా ఏ మేరకు మెప్పించారో ఓ సారి చూద్దాం. తుఫాన్ కథ పరంగా కొత్తగా ఏమీ అనిపించదు. కానీ తెరకెక్కించిన విధానం, తీసుకున్న అంశాలే తుఫాన్ చిత్రాన్నే ప్రత్యేకంగా నిలబెడతాయి. గల్లీల్లో దందాగిరి చేసే రౌడీగా అజీజ్ అలీ తిరుగుతుంటాడు. గూండా అంటూ తనను అనన్య ప్రభు (మృణాల్‌ ఠాకూర్‌) అని సంబోధించడంతో తన బతకుతున్న తీరుపై అనుమానం కలుగుతుంది. అయితే అలీ తనలోని శక్తిని తెలుసుకుని బాక్సర్‌‌గా మారాలని అనుకుంటారు. అందుకోసం హిందుత్వవాది అయిన నానా ప్రభు (పరేశ్ రావల్) దగ్గర శిక్షణ తీసుకోవాలని అనుకుంటాడు. మొదట ఒప్పుకోకపోయినా చివరకు శిష్యుడిగా తీసుకుంటాడు. అలా మరో వైపు అనన్య, అలీ ఇద్దరూ కూడా ప్రేమించుకుంటూ ఉంటారు. అలీలో ఉన్న మెరుపు వేగాన్ని, బలాన్ని చూసి అనతికాలంలోనే తిరుగులేని బాక్సర్‌గా నిలిపి తుఫాన్ అనే ట్యాగ్ ఇస్తాడు. అసలే హిందుత్వ వాది అయిన నానా.. తన కూతురితో అలీ ప్రేమలో ఉన్నాడని తెలియడం అంతెత్తున లేస్తాడు. అక్కడితో పరిస్థితులు మారుతాయి. ప్రేమను గెలిపించుకోవడం కోసం ఆటను వదిలేయాల్సి వస్తుంది. ప్రేమ కోసం చివరకు ఆటకు ఐదేళ్లు దూరంగా ఉండాల్సి వస్తుంది. అయితే అలీ తుఫాన్‌గా మారతాడా? తిరిగి ఆటను ఎంచుకుంటాడా? అసలు అలీ ఎందుకు బ్యాన్ కావాల్సి వచ్చింది? గురువైన నానా ప్రభు చివరకు అలీ కోసం ఏం చేస్తాడు? అలీ చాంపియన్‌గా నిలుస్తాడా? అన్నదే కథ. ఇక మామూలుగానే స్పోర్ట్స్ డ్రామాలు ఇండియన్ తెర మీద రికార్డులు క్రియేట్ చేస్తుంటాయి. అయితే ఆటను ప్రధానంగా చూపించినా కూడా అందులో అంతర్లీనంగా ప్రేమ కథలను కూడా జొప్పిస్తారు. ఇంకొన్ని వాటిల్లో సామాజిక అంశాలు, సమస్యలను చూపిస్తారు. తుఫానులో అన్నీ కలగలిపి చూపించారు. బాక్సింగ్ చుట్టూ కథ తిరిగినా కూడా ఇందులో చక్కని ప్రేమ కథను, హిందూ ముస్లింల సమస్యలను చూపించారు. హిందూ ముస్లింలు పెళ్లి చేసుకుంటే సమాజం ఎలా చూస్తుంది? వారిని ఎలా వెలి వేస్తుంది? అనే అంశాలను కూడా టచ్ చేశారు. అయితే ఈ తుఫానులో రక్తికట్టించే నటీనటులు ఉండటం కలిసి వచ్చింది. ఎందుకంటే ఇలాంటి సినిమాలకు కథ ఏంటి? కథనం ఎలా ఉంటుంది? క్లైమాక్స్ ఎలా ఉండబోతోంది? అనేవి సాధారణ ప్రేక్షకుడు సైతం పసిగట్టేయగలడు. కథ, కథనాలు అలా ఉన్నా ప్రేక్షకుడిని అందులో లీనం చేయగలిగే నటీనటులు ఉంటే సినిమా స్థాయి మారుతుంది. తుఫాను చిత్రాన్ని ఫర్హాన్ అఖ్తర్ తన భుజాల మీద మోసేశారు. పాత్రకు తగ్గట్టు మారడం పరాన్ అఖ్తర్‌కు వెన్నతో పెట్టిన విద్య. బాక్సర్‌గా ఎంత ఫిట్‌గా ఉండాలి.. ప్రొఫెషన్ బాక్సర్‌గా కనిపించేందుకు ఫరాన్ పడ్డ కష్టం కనిపిస్తుంది. తుఫాన్ మొత్తానికి ఫరాన్ వన్ మెన్ షోగా మిగిలిపోతారు. ఇక అనన్యగా నటించిన మృణాల్‌ ఠాకూర్‌ అందంతోనూ, నటనతోనూ మెప్పించారు. తన అనుభవంతో గురువు అయిన నానా ప్రభు పాత్రలో పరేశ్ రావెల్ అవలీలగా నటించేశారు. మిగతాపాత్రధారులందరూ కూడా తమ పరిధి మేరకు నటించారు. తుఫాను వంటి సినిమాకు సంగీతం, నేపథ్య సంగీతం ప్రాణంగా నిలుస్తుంది. ఈ చిత్రంలోని పాటలు బాగానే ఉన్నాయి. బ్యాక్ గ్రౌండ్ స్కోర్ బాగా కలిసి వచ్చే అంశం. మాటలు అక్కడక్కడా ఆలోచనలు రేకెత్తించేలా ఉంటాయి. ఆటను దైవంగా భావించడం, హిందూ ముస్లిం మత తగాదాలను సున్నితంగా స్పృశిస్తూ రాసుకున్న డైలాగ్‌లు ఆకట్టుకుంటాయి. సినిమాటోగ్రఫీ, ఎడిటింగ్ ఇలా అన్ని విభాగాలు తమ శక్తి మేరకు పని చేశాయి. చివరగా.. ప్రభావం చూపెట్టే ‘తుఫాను’.

from Telugu Movie News | Movie News in Telugu | Movie Gossips in Telugu https://ift.tt/3ieAANq
v