ప్రతి మగాడు మా ఆయనలా ఆలోచించాలి.. టాటూ అందుకే వేయించుకున్నా: అనసూయ

స్టార్ యాంకర్, అనసూయ భరద్వాజ్ ఒకవైపు కుటుంబాన్ని చూసుకుంటూనే మరోవైపు తన వృత్తిలో కొనసాగుతున్నారు. మహిళలు తమకు నచ్చిన పని చేయడానికి, తాము అనుకున్నది సాధించడానికి పెళ్లి, పిల్లలు అడ్డుకాదని నిరూపిస్తున్నారు. ఒకవైపు టీవీలో యాంకరింగ్ చేస్తూనే.. మరోవైపు సినిమాల్లో రాణిస్తున్నారు. తెలుగు రాష్ట్రాల్లో అనసూయ పేరు తెలియని ప్రేక్షకులు ఉండరంటే అతిశయోక్తికాదు. అంతలా ఆమె తెలుగు ఆడియన్స్‌కు దగ్గరైపోయారు. టీవీ, సినిమాల ద్వారానే కాకుండా సోషల్ మీడియా ద్వారా కూడా ఆడియన్స్‌తో అనసూయ టచ్‌లో ఉంటున్నారు. యూట్యూబ్, ఇన్‌స్టాగ్రామ్ ద్వారా వీడియోలు, ఫొటోలను అభిమానులతో పంచుకుంటున్నారు. తాజాగా మార్చి 8న అంతర్జాతీయ మహిళా దినోత్సవాన్ని పురష్కరించుకుని తన యూట్యూబ్ ఛానెల్‌లో ఒక వీడియోను అప్‌లోడ్ చేశారు అనసూయ. హైదరాబాద్‌లోని నలగండ్లలో ఉన్న ఒక రెస్టారెంట్‌లో ఈ వీడియోను చిత్రీకరించారు. ఆ రెస్టారెంట్‌లో ఆర్డర్ చేసిన క్రెప్ (దోసె లాంటి వంటకం) తింటూ, పుచ్చకాయ జ్యూస్ తాగుతూ 30 ప్రశ్నలకు ఈ వీడియోలో అనసూయ సమాధానాలు చెప్పారు. తన టీమ్ తయారుచేసిన ఈ ప్రశ్నలకు తనదైన శైలిలో సమాధానాలు ఇచ్చారు అనసూయ. వీటిలో కొన్ని ప్రశ్నలు, అనసూయ చెప్పిన సమాధానాలు చాలా ఆసక్తికరంగా ఉన్నాయి. ‘సినిమాలు, యాంకరింగ్ కాకపోయి ఉంటే.. మీ ఇంకొక ప్రొఫెషన్ ఏమై ఉంటుంది?’ అనే ప్రశ్నకు అనసూయ సమాధానం చెబుతూ.. ‘‘ఎన్నిసార్లు చెప్పాలి, ఇంట్లో మా ఆయనకు బాక్స్ కట్టి ఆఫీసుకు పంపించేదాన్ని. ఇంటి దగ్గరే వ్యవసాయం చేస్తూ పూలు, ఫలములు పండించి.. చక్కగా మా పిల్లలకు, మా ఆయనకు బాక్స్ కట్టి ఇచ్చేసి ఉండేదాన్ని. అది నా డ్రీమ్ జాబ్. అయినప్పటికీ, నేను ఎంబీఏ హెచ్‌ఆర్ చేశాను కాబట్టి ఇంతకు ముందు హెచ్ఆర్ చేసేదాన్ని అదే కంటిన్యూ చేసేదాన్నేమో. లేదంటే ఒక మంచి గృహిణి అయ్యుండేదాన్ని’’ అని వెల్లడించారు. ‘ఒక మహిళగా మగాళ్ల ఆలోచనలు ఎలా ఉండాలని మీరు కోరుకుంటున్నారు?’ అని అడిగిన ప్రశ్నకు.. ‘‘చాలా ఉన్నాయి. అవన్నీ చెప్పాలంటే ప్రత్యేకంగా ఒక ఎపిసోడ్ కావాలి. ప్రతి మగాడు మా ఆయనలా ఆలోచించాలని నేను అనుకుంటాను. నా భర్త అని చెప్పట్లేదు.. ఆయన చాలా బాగా ఆలోచిస్తారు. ఎప్పుడైనా ఆయన్ని కూర్చోబెట్టి నేను సెపరేట్ సెషన్ చేస్తాను’’ అని అనసూయ చెప్పుకొచ్చారు. ఇక ఒక మగాడిలో ఉండాల్సిన క్వాలిటీ నిజాయతీ అని తాను భావిస్తానని ఆమె వెల్లడించారు. తన ఒంటిపై రెండు టాటూలు ఉన్నాయని చెప్పిన అనసూయ.. చాతిపై వేయించుకున్న టాటూ తన భర్త ముద్దు పేరు ‘నిక్కు’ అని తెలిపారు. ‘‘సాధారణంగా నిశ్చితార్థం జరిగిన ఆరు నెలలకే పెళ్లైపోవాలి. మాకు ఏడాదిన్నర తరవాత పెళ్లయింది. మా బావగారికి పెళ్లి కుదరక మా పెళ్లి ఆలస్యమైంది. మా నిశ్చితార్థం జరిగి ఏడాది పూర్తయిన సందర్భంగా ఈ టాటూ వేయించుకున్నాను. మా ఆయన పుట్టినరోజు నాడే మా నిశ్చితార్థం జరగడం మరో కారణం. ఇక చేతి మణికట్టు దగ్గర ఉన్న టాటూ ‘Kalon’ అంటే బాహ్య సౌందర్యం కంటే అంతర సౌందర్యం గొప్పది అని. త్వరలో మూడో టాటూ కూడా వేయించుకోబోతున్నాను’’ అని అనసూయ చెప్పారు. ఇంకా అనసూయ చెప్పిన సమాధానాలు కింది వీడియోలో చూడొచ్చు.

from Telugu Movie News | Movie News in Telugu | Movie Gossips in Telugu https://ift.tt/3kWPmZY
v