నేచురల్ స్టార్ నాని హీరోగా వస్తోన్న కంప్లీట్ ఫ్యామిలీ ఎంటర్టైనర్ ‘టక్ జగదీష్’. శివ నిర్వాణ దర్శకత్వం వహించారు. నానితో ‘నిన్నుకోరి’ లాంటి హిట్ కొట్టిన శివ నిర్వాణ.. ఇప్పుడు జానర్ మార్చి నేచురల్ స్టార్ను సరికొత్తగా చూపించబోతున్నారు. నాని సరసన రీతూ వర్మ, ఐశ్వర్య రాజేష్ హీరోయిన్లుగా నటించిన ఈ చిత్రంలో నాజర్, జగపతి బాబు, రావు రమేష్, వీకే నరేష్, డానియల్ బాలాజీ, తిరువీర్, రోహిణి, దేవదర్శిని, ప్రవీణ్.. ఇలా భారీ తారాగణమే ఉంది. నాని 26వ సినిమాగా రూపొందిన ‘టక్ జగదీష్’ను షైన్ స్క్రీన్స్ బ్యానర్పై సాహు గారపాటి, హరీష్ పెద్ది సంయుక్తంగా నిర్మిస్తున్నారు. ఏప్రిల్ 23న ఈ చిత్రం ప్రేక్షకుల ముందుకు వస్తోంది. నేడు (ఫిబ్రవరి 23న) నాని పుట్టినరోజు సందర్భంగా ‘టక్ జగదీష్’ టీజర్ను విడుదల చేశారు. 1:36 నిమిషాల నిడివి ఉన్న ఈ టీజర్లో ఫ్యామిలీ డ్రామా, యాక్షన్, లవ్ అన్నీ చూపించేశారు. అందమైన పల్లెటూరిని ఏరియల్ షాట్లో చూపించడంతో టీజర్ మొదలైంది. కోడి పందేల్లో గాయపడిన కోడి కాలికి కట్టుకడుతూ నాని ‘టక్’లో ఎంట్రీ ఇచ్చారు. మోహన భోగరాజు ఆలపించిన ‘ఏటికొక్కపూట యానాది పాట’ అనే పాటతో ఈ టీజర్ కొనసాగింది. అయితే, టీజర్ ఆఖర్లో కాళ్లకు పారాణితో నాని నడుచుకుంటూ రావడం ఆసక్తి రేపుతోంది. బహుశా కాళ్ల పారాణి ఆరకముందే నాని ఫైట్ చేస్తారేమో. బయనియన్, లుంగీలో ఉన్న నాని కాళ్లకు పారాణితో ఇళ్ల మధ్యలో నుంచి నడుచుకుంటూ వెళ్తుంటే టీజర్ ముగిసింది. మొత్తం ఒక కంప్లీట్ ఫ్యామిలీ ఎంటర్టైనర్ను తెలుగు ప్రేక్షకులకు అందించబోతున్నారు నాని. ఈ టీజర్ను ట్వీట్ చేసిన నాని.. ‘‘పండగకి వచ్చే సినిమాలు కొన్ని.. పండగలాంటి సినిమాలు కొన్ని’’ అని పేర్కొన్నారు. అంటే, ‘టక్ జగదీష్’ పండగ లాంటి సినిమా అన్న మాట. ఈ సినిమాకు తమన్ సంగీతం సమకూర్చగా.. ప్రసాద్ మూరెళ్ల సినిమాటోగ్రాఫర్గా పనిచేశారు. ప్రవీణ్ పూడి ఎడిటర్గా, వెంకట్ ఫైట్ మాస్టర్గా బాధ్యతలు నిర్వర్తించారు.
from Telugu Movie News | Movie News in Telugu | Movie Gossips in Telugu https://ift.tt/3upAwzy
v
No comments:
Post a Comment