బ్యాక్‌గ్రౌండ్ లేకుండా హృతిక్ రోషన్ స్టార్ అవ్వలేదు.. దయచేసి కష్టాన్ని గుర్తించండి: బెల్లంకొండ శ్రీనివాస్

సినిమా ఇండస్ట్రీలో స్వయంకృషితో వచ్చే హీరోల కన్నా బ్యాక్‌గ్రౌండ్‌తో వచ్చే హీరోలే అధికం. ప్రస్తుతం ఇండస్ట్రీని ఏలుతోన్న మెగా, నందమూరి హీరోలతో మొదలుకొని చాలా మంది హీరోలు బ్యాక్‌గ్రౌండ్ ఉన్నవాళ్లే. అయితే, బ్యాక్‌గ్రౌండ్‌తో వచ్చిన హీరోలంతా సక్సెస్ కాలేదు. బ్యాక్‌గ్రౌండ్‌కి కష్టం, ప్రతిభ తోడైన హీరోలు ప్రస్తుతం ఇండస్ట్రీలో రాణిస్తున్నారు. అయినప్పటికీ బ్యాక్‌గ్రౌండ్‌తో వచ్చే హీరోలపై విమర్శలు వస్తూనే ఉంటాయి. అర్హత లేకపోయినా బ్యాక్‌గ్రౌండ్‌తో హీరోలు అయిపోతున్నారని చాలా మంది విమర్శిస్తూ ఉంటారు. ప్రముఖ నిర్మాత బెల్లంకొండ సురేష్ పెద్ద కుమారుడు బెల్లంకొండ సాయి శ్రీనివాస్ హీరో అయినప్పుడు కూడా అంతా ఇలానే విమర్శించారు. అయినప్పటికీ వాటిని పట్టించుకోకుండా కష్టపడి సినిమా సినిమాకు తన సామర్థ్యాన్ని పెంచుకుంటూ వెళ్తున్నారు శ్రీనివాస్. వైవిధ్యమైన సినిమాలు చేస్తున్నారు. ఈ సంక్రాంతికి ‘అల్లుడు అదుర్స్’ అంటూ ప్రేక్షకుల ముందుకు వస్తున్నారు. ఈనెల 14న విడుదలవుతోన్న ఈ సినిమా ప్రీ రిలీజ్ ఈవెంట్ ఆదివారం హైదరాబాద్‌లో జరిగింది. ఈ వేడుకలో శ్రీనివాస్ మాట్లాడుతూ ‘బ్యాక్‌గ్రౌండ్’ ప్రస్తావన తీసుకొచ్చారు. ‘‘బ్యాక్‌‌గ్రౌండ్ ఉన్న యాక్టర్స్ గురించి చాలా మంది ఏదో మాట్లాడుతుంటారు. దయచేసి బ్యాక్‌గ్రౌండ్ చూడటం మానేసి మా కష్టాన్ని చూడండి. బ్యాక్‌గ్రౌండ్ లేకుండా హృతిక్ రోషన్, టైగర్ ష్రాఫ్, అజయ్ దేవగణ్ స్టార్లు కాలేదు. వాళ్లు కూడా బ్యాక్‌గ్రౌండ్‌తో వచ్చినవాళ్లే. మా కష్టాన్ని నమ్ముకుని సినిమాల్లో ప్రయత్నిస్తాం. దయచేసి దాన్ని గుర్తించండి. ఒక మంచి సినిమా మీ అందరికీ ఇవ్వడానికి మేం చాలా కష్టపడి చేస్తాం. మమ్మల్ని ఆదరించి, ప్రోత్సహించాలని మనస్ఫూర్తిగా కోరుకుంటున్నాను’’ అని చాలా సున్నితంగా, మర్యాదగా మాట్లాడారు శ్రీనివాస్.

from Telugu Movie News | Movie News in Telugu | Movie Gossips in Telugu https://ift.tt/3nwdlyT
v