నటుడి హత్య: ఒంటినిండా కత్తి పోట్లు.. పట్టపగలే దారుణం

కర్ణాటకలోని బంట్వాల్ పట్టణంలో పట్టపగలు ఒక నటుడు దారుణ హత్యకు గురయ్యాడు. కోస్టల్‌వుడ్ (తుళు సినిమా) నటుడు, రౌడీ షీటర్ సురేంద్ర బంట్వాల్ (39) బుధవారం బీసీ రోడ్‌లో ఉన్న తన అపార్ట్‌మెంట్‌లో దారుణ హత్యకు గురైనట్టు పోలీసులు గుర్తించారు. సురేంద్ర ఒంటినిండా కత్తి పోట్లు ఉన్నాయని, అతని శవం సోఫాలో పడి ఉందని పోలీసులు తెలిపారు. ఆర్థిక లావాదేవీల కారణంగానే ఈ హత్య జరిగి ఉండొచ్చని పోలీసులు అనుమానిస్తున్నారు. తన ఇంట్లోనే సురేంద్రను నిర్బంధించి పట్టపగలు ఈ హత్య చేసినట్టు పోలీసులు ప్రాథమిక నిర్ధారణకు వచ్చారు. బంట్వాల్ పట్టణ ఇన్‌స్పెక్టర్, విచారణ అధికారి అయిన టీడీ నాగరాజ్ వెల్లడించిన వివరాల ప్రకారం.. సురేంద్రను పట్టపగలే అతని ఇంట్లో నిర్బంధించి పదునైన ఆయుధాలతో పొడిచి చంపారు. ఈ హత్యకు ఆర్థిక లావాదేవీలే కారణమని అనుమానిస్తున్నారు. ఈ కేసును అన్ని కోణాల్లో విచారిస్తున్నారు. నిందితులను పట్టుకోవడానికి పోలీసులు బృందాలుగా ఏర్పడి అన్వేషణ మొదలుపెట్టారు. ఫోరెన్సిక్, డాగ్ స్వాడ్ కూడా రంగంలోకి దిగినట్టు, ఆధారాలను సేకరిస్తున్నట్టు నాగరాజ్ వెల్లడించారు. కాగా, హత్యకు గురైన సురేంద్రపై 13 క్రిమినల్ కేసులు ఉన్నట్టు పోలీసులు తెలిపారు. ఇద్దరు బీజేపీ కార్యకర్తలపై మారణాయుధాలతో దాడి చేసినందుకు గాను 2018లో సురేంద్రను పోలీసులు అరెస్టు చేశారు. అప్పట్లో సురేంద్ర దాడికి పాల్పడిన వీడియో సోషల్ మీడియాలో విపరీతంగా వైరల్ అయ్యింది. సురేంద్రపై రౌడ్ షీట్ కూడా తెరిచారు. గత సార్వత్రిక ఎన్నికల సమయంలో సురేంద్ర కాంగ్రెస్ పార్టీలో చేరాడు. అలాగే, ‘ఛలి పొలిలు’ అనే తుళు సినిమా, ‘సవర్ణ ధీర్ఘ సంధి’ అనే కన్నడ సినిమాతో పాటు పలు చిత్రాల్లో సురేంద్ర నటించాడు.

from Telugu Movie News | Movie News in Telugu | Movie Gossips in Telugu https://ift.tt/2Hfgi82
v