అంబటి రాంబాబు వీడియోను అరగంటకి ఒకసారి చూస్తున్నా.. త్వరలోనే వచ్చేస్తా: పృథ్వీ

హాస్యనటుడు, వైఎస్సార్ కాంగ్రెస్ పార్టీ నేత పృథ్వీరాజ్ తీవ్ర అనారోగ్యంతో హాస్పిటల్‌లో చేరిన సంగతి తెలిసిందే. తాను తీవ్రమైన జ్వరంతో బాధపడుతున్నానని తెలుపుతూ నిన్న ఒక సెల్ఫీ వీడియోను విడుదల చేశారు పృథ్వీరాజ్. కరోనా పరీక్ష చేయించానని నెగిటివ్ వచ్చిందని ఆ వీడియో పృథ్వీరాజ్ చెప్పారు. కానీ, ఆ తరవాత మరోసారి చేసిన పరీక్షలో ఆయనకి కరోనా పాజిటివ్ నిర్ధారణ అయ్యింది. ప్రస్తుతం ఆయన క్వారంటైన్ సెంటర్‌లో ఉంటూ చికిత్స పొందుతున్నారు. నిన్న ముక్కులో ఆక్సిజన్ పైప్స్ పెట్టుకుని కనిపించిన పృథ్వీరాజ్.. ఈరోజు కాస్త కోలుకున్నారు. తాను కోలుకుంటున్నానని తెలియజేస్తూ మరో వీడియోను పృథ్వీరాజ్ విడుదల చేశారు. కరోనాను జయించి త్వరలోనే బయటికి వస్తానని చెప్పారు. తనకు ఆరోగ్యం బాగాలేదని తెలిసి వైఎస్సార్‌సీపీ ఎమ్మెల్యే అంబటి రాంబాబు సహా ఆంధ్రప్రదేశ్‌లోని ఎంతో మంది వైఎస్సార్‌సీపీ నాయకులు, కార్యకర్తలు తనకు ఫోన్ చేశారని పృథ్వీరాజ్ వెల్లడించారు. తనకు కరోనా పాజిటివ్ అని తెలియగానే అందరూ ఫోన్ చేసి తనకు ప్రోత్సాహాన్ని ఇచ్చారని తెలిపారు. Also Read: అయితే, అంబటి రాంబాబుపై పృథ్వీరాజ్ ప్రశంసల వర్షం కురిపించారు. ‘‘మా ఎమ్మెల్యే అంబటి రాంబాబు గారు నాకు మనో ధైర్యాన్ని ఇచ్చారు. ఉదయం నాకు ఫోన్ చేసి ధైర్యం చెప్పారు. వారి వీడియోను ప్రతి అరగంటకు ఒకసారి ప్లే చేసుకొని చూస్తున్నాను. పోరాట పటిమకు నాంది అంబటి రాంబాబు గారు. ఆంధ్ర రాష్ట్రంలో ఎక్కడెక్కడి నుంచో వైఎస్సార్‌సీపీ అభిమానులు, ప్రజలు నాకు కొండంత ఊపిరినిచ్చారు. నిన్నటి కంటే ఈరోజు నేను వెయ్యి రెట్లు బెటర్ అయ్యాను. త్వరలోనే మీ ముందుకు వచ్చి ఎప్పటిలానే నా వాణి, నా బాణి రెండూ వినిపిస్తాను’’ అని పృథ్వీరాజ్ వీడియోలో అన్నారు. యుద్ధ రంగంలో దిగినప్పుడు గాయాలైనా, ఏమైనా ఎదుర్కోవాలి.. వీరోచితంగా పోరాడి బయటికి రావాలి అని అంబటి రాంబాబు చెప్పారని, దాన్నో తాను ఫాలో అవుతున్నానని పృథ్వీరాజ్ చెప్పారు. ఎవరూ కంగారు పడొద్దని.. తానొక ఫైటర్‌నని.. కరోనాపై తాను ఫైట్ చేస్తానని, త్వరలోనే బయటికి వస్తానని పృథ్వీరాజ్ చాలా కాన్ఫిడెంట్‌గా చెప్పారు. కాగా, అంబటి రాంబాబుకు కూడా ఇటీవల కరోనా పాజిటివ్ వచ్చిన సంగతి తెలిసిందే. ఈ విషయాన్ని జులై 22న అంబటి రాంబాబు స్వయంగా వీడియో మెసేజ్ ద్వారా తెలిపారు. ఆ వీడియోనే ఇప్పుడు పృథ్వీ అరంగటకు ఒకసారి చూస్తున్నట్టున్నారు.

from Telugu Movie News | Movie News in Telugu | Movie Gossips in Telugu https://ift.tt/2DGjYgA
v