కరోనా వైరస్ ప్రజల ప్రాణాలను హరించడమే కాదు.. వారిని ఆర్థికంగా కూడా దెబ్బతీస్తోంది. ఈ భయంకర వైరస్ కారణంగా ప్రపంచ ఆర్థిక వ్యవస్థ కుదేలైంది. మన దేశంలోనూ అదే పరిస్థితి. ఈ వైరస్ను నిర్మూలించేందుకు కేంద్ర ప్రభుత్వం 21 రోజుల లాక్డౌన్ విధించడంతో పేద ప్రజలు తీవ్ర ఇబ్బందులు పడుతున్నారు. వీళ్లని ఆదుకోవడానికి ప్రభుత్వాలే కాదు.. మనసున్న ప్రతి ఒక్కరూ ముందుకొస్తున్నారు. సినీ నటులు, పారిశ్రామికవేత్తలు, విద్యాసంస్థలు తమ వంతు ఆర్థికసాయాన్ని ప్రభుత్వాలకు అందజేశారు. ఇక సినీ పరిశ్రమలో రోజువారీ వేతనానికి పనిచేసే కార్మికుల కోసం సినీ పెద్దలే స్వయంగా ఛారిటీ ఏర్పాటు చేశారు. అయినప్పటికీ కొంత మంది సినీ ప్రముఖులు స్వయంగా పేదవారికి సాయం అందిస్తున్నారు. అయితే, ఇండస్ట్రీలో పెద్ద ఫ్యామిలీల్లో ఒకటైన మంచు కుటుంబం ఒక అడుగు ముందుకేసి గ్రామాలనే దత్తత తీసుకుంది. సామాజిక సేవలో ముందుండే సీనియర్ నటుడు మంచు మోహన్ బాబు తన పెద్ద కుమారుడు మంచు విష్ణుతో కలిసి చిత్తూరు జిల్లా చంద్రగిరి నియోజకవర్గంలోని 8 గ్రామాలను దత్తత తీసుకున్నారు. గత కొద్ది రోజులుగా దత్తత తీసుకున్న గ్రామాల్లోని పేద కుటుంబాలకు ఆహారాన్ని సరఫరా చేస్తున్నారు. రోజుకు రెండు పూటలా ఆహారం పంపిణీ చేస్తున్నారు. లాక్డౌన్ ముగిసే వరకు ఇలా ఆహారాన్ని పంపిణీ చేయనున్నారు. ఇది కాకుండా ఎనిమిది టన్నుల కూరగాయలను ఈ గ్రామాల్లోని పేదలందరికీ ఉచితంగా సరఫరా చేస్తున్నారు. Also Read: అంతేకాకుండా, ఈ 8 గ్రామాల్లో ప్రజలకు మాస్కులు, శానిటైజర్లను కూడా అందిస్తున్నారు. మోహన్ బాబుది చిత్తూరు జిల్లా అన్న సంగతి తెలిసిందే. ఏర్పేడు మండలం మోదుగులపాలెంలో మోహన్ బాబు జన్మించారు. తమ ప్రాంతం విద్యా రంగంలోనూ అభివృద్ధి చెందాలని.. రంగపేట సమీపంలో మోహన్ బాబు ‘శ్రీ విద్యానికేతన్’ పేరుతో విద్యా సంస్థల్ని నడుపుతున్నారు. ఇప్పుడు తమ ప్రాంతంలో ఏ ఒక్కరూ ఆకలితో అలమటించకూడదని ఆహారాన్ని అందించి తమ మంచి మనసును చాటుకున్నారు. మంచు ఫ్యామిలీ మంచి తనాన్ని సోషల్ మీడియాలో కొనియాడుతున్నారు.
from Telugu Movie News | Movie News in Telugu | Movie Gossips in Telugu https://ift.tt/2UNAPnU
v
No comments:
Post a Comment