కరోనా ఎఫెక్ట్: మార్చి 31 వరకు థియేటర్లు మూసివేత.. మోహన్‌లాల్‌కు గట్టి దెబ్బ

భయంకర కరోనా వైరస్ దేశంలో విజృంభిస్తోంది. రోజురోజుకి కరోనా పాజిటివ్ కేసులు పెరుగుతున్నాయి. దేశవ్యాప్తంగా ఇప్పటి వరకు 56 కరోనా పాజిటివ్ కేసులు నమోదుకాగా.. ఒక్క కేరళలోనే 12 కేసులు నమోదయ్యాయి. కేరళలో 12వ కరోనా కేసు నమోదైనట్టు మంగళవారం ప్రభుత్వం అధికారికంగా ప్రకటించింది. రోజురోజుకి రాష్ట్రంలో కరోనా కేసులు పెరుగుతుండటంతో కేరళ ప్రభుత్వం అప్రమత్తమైంది. రక్షణ చర్యలను మరింత కట్టుదిట్టం చేసింది. మార్చి 31 వరకు రాష్ట్రంలో సినిమా థియేటర్లు మూసివేయాలని ముఖ్యమంత్రి పినరయి విజయన్ ఆదేశాలు జారీ చేశారు. వైరస్ మరింత వ్యాప్తి చెందకుండా ఉండటానికి విద్యా సంస్థలకు కూడా ప్రభుత్వం సెలవులు ప్రకటించింది. కాగా, కేరళ ప్రభుత్వం తీసుకున్న ఈ నిర్ణయం అక్కడి సినీ పరిశ్రమపై భారీ ప్రభావం చూపనుంది. ఈ శుక్రవారం, అలాగే ఈ నెలలో విడుదల కావాల్సిన సినిమాలు వాయిదా పడనున్నాయి. వాయిదా పడే సినిమాల్లో మలయాళ సూపర్ స్టార్ మోహన్‌లాల్ భారీ చిత్రం ‘మరక్కార్: అరబికడలింటే సింహం’ ఉంది. ప్రముఖ దర్శకుడు ప్రియదర్శన్ దర్శకత్వం వహించిన ఈ సినిమా మార్చి 26న విడుదల కావాల్సి ఉంది. పాన్ ఇండియా మూవీగా తెరకెక్కిన ఈ సినిమాను మలయాళంతో పాటు హిందీ, తెలుగు, తమిళం, కన్నడ భాషల్లోనూ మార్చి 26న విడుదల చేస్తున్నట్టు చిత్ర యూనిట్ ఇప్పటికే ప్రకటించింది. Also Read: ‘మరక్కార్’ సినిమాను ప్రకటించిన దగ్గర నుంచి మోహన్‌లాల్ ఫ్యాన్స్ ఈ సినిమా కోసం ఎంతో ఆసక్తిగా ఎదురుచూస్తు్న్నారు. పీరియాడిక్ డ్రామాగా తెరకెక్కిన ఈ సినిమాను రూ.100 కోట్ల భారీ బడ్జెట్‌తో నిర్మించారు. ఆంటొని పెరుంబవూర్, ఆశీర్వాద్ సినిమాస్ సంయుక్తంగా నిర్మించిన ఈ చిత్రం మలయాళ సినీ చరిత్రలోనే భారీ బడ్జెట్ మూవీ. జామోరిన్ ఆఫ్ కాలికట్ సామ్రాజ్యపు నావికాదళ అధిపతి అయిన కుంజలి మరక్కార్ 4 జీవిత కథ ఆధారంగా ఈ సినిమాను తెరకెక్కించారు. మోహన్‌లాల్ టైటిల్ రోల్ పోషించారు. Also Read: బాలీవుడ్ నటుడు సునీల్ శెట్టి, మంజు వారియర్, ప్రణవ్ మోహన్‌లాల్, అర్జున్, ప్రభు, సుహాసిని, కీర్తి సురేష్, కళ్యాణి ప్రియదర్శన్ ముఖ్య పాత్రలు పోషించిన ఈ చిత్రానికి ‘బాహుబలి’ ఫేమ్ సాబు సిరిల్ ప్రొడక్షన్ డిజైనర్‌గా వ్యవహరించారు. ఈ సినిమా తెలుగు ట్రైలర్‌ను ఇటీవల మెగాస్టార్ చిరంజీవి విడుదల చేశారు. తెలుగులో ‘మరక్కార్: అరేబియా సముద్ర సింహం’ అనే టైటిల్‌తో వస్తోంది. కాగా, కేరళలో థియేటర్ల మూతతో ఈ సినిమాతో పాటు పలు మలయాళ సినిమాలు వాయిదా పడుతున్నాయి.

from Telugu Movie News | Movie News in Telugu | Movie Gossips in Telugu https://ift.tt/2VZjwkR
v