మెలొడీ క్వీన్ గాత్రం అమృతంలా ఉంటుంది. ఆమె చేత పాటలు పాడించుకోవాలని కోరుకోని సంగీత దర్శకుడు ఉండడంటే అతిశయోక్తి కాదు. దాదాపుగా అన్ని భాషల్లోనూ ఆమె పాటలు పాడారు. తన కెరీర్లో దాదాపు 26వేలకు పైగా పాటలు పాడారు. వాటిలో ఎక్కువగా హిందీ పాటలే ఉన్నాయి. కానీ తెలుగులో ఆమె కేవలం మూడు పాటలే పాడటం మన దురదృష్టం. తెలుగులో ఆమె ఎక్కువ పాటలు పాడకపోవడానికి కారణం ఆమెకే తెలియాలి. 1955లో వచ్చిన ‘సంతానం’ సినిమాలోని ‘నిదురపోరా తమ్ముడా’, ‘దొరికితే దొంగలు’ సినిమాలోని ‘శ్రీ వేంకటేశా..’, 1988లో వచ్చిన ‘ఆఖరి పోరాటం’ సినిమాలోని ‘తెల్లచీరకు’ పాటలు ఆలపించారు. 1945లో వచ్చిన ‘బడీ మా’ సినిమాలోని ‘జననీ జన్మభూమి’ అనే పాటతో లత తన సింగింగ్ కెరీర్ను ప్రారంభించారు. అక్కడి నుంచి ఆమె కెరీర్లో వెనక్కి తిరిగి చూసుకున్నది లేదు. వరుసగా పాటలు పాడుతూనే ఉన్నారు. ఆ పాటలు ఈ తరం వారికి తెలీకపోవచ్చు. కానీ 1995లో వచ్చిన ‘దిల్వాలే దుల్హనియా లేజాయేంగే’ సినిమా ఈ తరం వారికి బాగా గుర్తుండిపోయిన సినిమా. ఈ సినిమాలోని ‘తుఝే దేఖాతోయే జానా సనమ్’ పాటను కూడా అంత తేలికగా మర్చిపోలేరు. ఈ పాటను లత.. ప్రముఖ గాయకుడు కుమార్ సానుతో కలిసి పాడారు. ఆ తర్వాత 2000లో ఐశ్వర్య రాయ్, షారుక్ ఖాన్ నటించిన ‘మొహబ్బతే’ సినిమాలోని ‘హమ్కో హమీసే చురాలో..’ పాట కూడా బాగా ఫేమస్ అయింది. 2004లో వచ్చిన ‘వీర్ జారా’ సినిమాలోని ‘దో పల్’ అనే పాట ఇప్పటికీ ఎవర్గ్రీనే. సినిమాలో ప్రేమికులైన షారుక్ ఖాన్, ప్రీతీ జింతా విడిపోయేటప్పుడు వచ్చే పాట అది. లత గాత్రంతో ఆ పాట జీవం పోసుకుంది. ఆ పాట ఆమె కాకుండా మరొకరు పాడి ఉంటే అంత పాపులారిటీ వచ్చుండేది కాదేమో. ఇదే సినిమాలో ‘తేరే లియే’ అనే పాట కూడా లతా మంగేష్కర్ పాడారు. ఈ పాట వినేటప్పుడు ప్రతీ ప్రేమికుడి హృదయం ద్రవించకమానదు. అయితే ఆమె 2009లో వచ్చిన ‘జైల్’ సినిమాలోని ‘డాటా సున్ లే’ అనే పాటను ఆలపించి తన సినీ సింగింగ్ కెరీర్కు ఫుల్ స్టాప్ పెట్టారు. ఆ తర్వాత ఆమె అన్నీ భక్తి పాటలను పాడారు. 2010 నుంచి వచ్చిన పాటల్లో వినదగ్గ సాహిత్యం లేదని, పైగా బూతు పాటలు ఎక్కువవుతున్నాయని ఆమె ఆవేదన వ్యక్తం చేశారు. అందుకే తాను సినిమాలకు పాటలు పాడటం ఆపేశానని తెలిపారు.
from Telugu Movie News | Movie News in Telugu | Movie Gossips in Telugu https://ift.tt/32FqeMs
v
No comments:
Post a Comment