సైరా చీటింగ్.. అబద్ధాలు చెప్పి ప్రొఫెసర్‌ను మోసం చేశారా? చిరు సినిమాపై ఆరోపణలు

మెగాస్టార్ చిరంజీవి హీరోగా.. ఉయ్యాలవాడ నరసింహా రెడ్డి జీవితం ఆధారంగా తెరకెక్కిన ‘సైరా’ సూపర్ హిట్ టాక్ సొంతం చేసుకుంది. చిరంజీవి నటన పట్ల సర్వత్రా ప్రశంసల జల్లు కురుస్తోంది. ఉయ్యాలవాడ నరసింహారెడ్డికి చిరంజీవి ఊపిరి పోశారని కితాబిస్తున్నారు. బాక్సాఫీస్ వద్ద ఈ చిత్రం దుమ్ము రేపుతోంది. కానీ ఈ చిత్ర యూనిట్‌పై రకరకాల ఆరోపణలు వస్తున్నాయి. తమకు డబ్బు చెల్లిస్తామని నిర్మాత మాటిచ్చారని.. ఇప్పుడు మాట్లాడటం లేదని ఉయ్యాలవాడ కుటుంబీకులు కొద్దిరోజుల క్రితం వరకు ఆరోపించిన సంగతి తెలిసిందే. తాజాగా ఓ ప్రొఫెసర్‌కు అన్యాయం జరిగిందనే వాదన మొదలైంది. “తెలుగు వీరగాథలు” అనే అంశంపై పరిశోధనలు చేసి పీహెచ్‌డీ పట్టా పొందిన ఆచార్య తంగిరాల వెంకట సుబ్బారావుకు చిత్ర యూనిట్ అన్యాయం చేసిందంటున్నారు. తంగిరాల మిత్రుడు, పద్యకళా పరిషత్తు అధ్యక్షుడైన ఎం. రామచంద్రప్రసాద్‌ పేరిట రాసిన ఓ లేఖ సోషల్ మీడియాలో వైరల్‌గా మారింది. తంగిరాల 1965 డిసెంబర్‌ నుంచి 1966 ఏప్రిల్‌ వరకు కడప, కర్నూలు జిల్లాల్లో పర్యటించి.. ఉయ్యాలవాడ నరసింహారెడ్డి గురించి అనేక విషయాలు, జానపద గేయాలు, వీరగాథలు సేకరించారని ఆయన మిత్రుడు రామచంద్రప్రసాద్‌ తెలిపారు. 1969 జూన్‌‌లో భారతిలో “ఉయ్యాలవాడ నరసింహారెడ్డి కథ” అనే వ్యాసాన్ని ప్రచురించారన్నారు. దీంతో ఈ స్వాతంత్ర్య సంగ్రామ యోధుడి గురించి అందరికీ తెలిసిందన్నారు. ఆచార్య తంగిరాల మరిన్ని పరిశోధనలు జరిపి, 1999లో “రేనాటి సూర్యచంద్రులు” పేరిట 600 పేజీల పుస్తకాన్ని ప్రచురించారని రామచంద్రప్రసాద్‌ తెలిపారు. ఇందులో నరసింహారెడ్డిని గురించి పూర్తి వివరాలు ఉన్నాయన్నారు. 2017లో “సైరా” దర్శకుడి అసిస్టెంట్ రామ్మోహనరావు, పరుచూరి బ్రదర్స్‌ అసిస్టెంట్ బాలాజీ (దాము) ఆచార్య తంగిరాలను సంప్రదించి “రేనాటి సూర్యచంద్రులు” పుస్తకాన్ని, ఒక్కొక్కరు ఒక్కో కాపీ తీసుకొని వెళ్లారని రామచంద్రప్రసాద్‌ తెలిపారు. నరసింహారెడ్డిపై సినిమా తీస్తున్నారా? అని తంగిరాల ప్రశ్నిస్తే.. లేదు, సీరియల్ తీస్తున్నామని ఒకరు, పరిశోధన చేస్తున్నామని మరొకరు అబద్ధం చెప్పారట. తర్వాత చిరంజీవి హీరోగా భారీ బడ్జెట్‌తో సినిమా తెరకెక్కిస్తున్నట్టు పేపర్లో వచ్చింది. ఆ తర్వాత చిత్ర యూనిట్ తనను సంప్రదించకపోవడంతో తంగిరాల నొచ్చుకున్నారు. రూ.300 కోట్లతో సినిమా తీసి, తంగిరాల రాసిన గ్రంథాన్ని వాడుకున్నారు కానీ.. ఆయనకు ఏ మాత్రం విలువ ఇవ్వలేదని, టైటిల్ సాంగ్‌ను కూడా తంగిరాల సేకరించిన ఓ పాట నుంచి తీసుకున్నారని ఆయ మిత్రుడు తెలిపారు. సైరా చిత్ర యూనిట్ తంగిరాల పట్ల వ్యవహరించిన తీరును ఆయన ఖండించారు. ఈ ఆరోపణల పట్ల చిత్ర యూనిట్ ఎలా స్పందిస్తుందో చూడాలి మరి.

from Telugu Movie News | Movie News in Telugu | Movie Gossips in Telugu https://ift.tt/2oKYs2W
v