ఎన్నో దశాబ్దాలుగా తెలుగు ప్రేక్షకులను తన నటనతో అలరిస్తోన్న సీనియర్ నటుడు చలపతిరావును సినిమా వాళ్లు బాబాయ్ అని ఆప్యాయంగా పిలుచుకుంటారు. మహానటుడు స్వర్గీయ ఎన్టీ రామారావు దగ్గర నుంచి జూనియర్ ఎన్టీఆర్ వరకు మూడు తరాల హీరోలతో కలిసి పనిచేసిన దిగ్గజ నటుడు చలపతిరావు. ఇండస్ట్రీలో మంచి పేరున్న ఇమేజ్ రెండేళ్ల క్రితం మసకబారింది. ఆడవాళ్లపై ఒక ఆడియో ఫంక్షన్లో ఆయన చేసిన కామెంట్ తీవ్ర దుమారం రేపింది. ‘ఆడవాళ్లు పక్కలోకి పనికొస్తారు’ అని నవ్వుతూ ఆయన చేసిన కామెంట్పై మహిళలు తీవ్ర వ్యతిరేకత వ్యక్తం చేశారు. సోషల్ మీడియాలో అయితే చలపతిరావుపై తీవ్ర స్థాయిలో దుమారం రేగింది. ఇదంతా చూసి చాలా బాధపడిన చలపతిరావు ఆత్మహత్య చేసుకుందామని అనుకున్నారట. ఈ విషయాన్ని ఆయన ‘ఆలీతో సరదాగా’ కార్యక్రమంలో చెప్పారు. మహిళలంటే తనకు ఎంతో గౌరవమని.. కానీ, సోషల్ మీడియాలో వచ్చిన కామెంట్లు చూసి సూసైడ్ చేసుకుందామనుకున్నానని చలపతిరావు అన్నారు. Also Read: ‘‘లేడీస్ని నేను ఏదో అన్నానని సోషల్ మీడియాలో ఏకేశారు. నేన్నది వేరు.. వాళ్లు కల్పించింది వేరు. ఆడవాళ్లకు నేను చాలా గౌరవం ఇస్తా. 22 ఏళ్ల వయసులో భార్య చనిపోతే మళ్లీ పెళ్లి కూడా చేసుకోలేదు. ఇండస్ట్రీలో ఆడవాళ్లను నేను ఏనాడు పరుష మాటలు కానీ, తూలనాడటం కానీ, తప్పుడు మాటలు మాట్లాడటం కానీ ఇంత వరకు చేయలేదు. అటువంటిది నన్ను ఇలా అల్లరి చేశారని సూసైడ్ చేసుకుంటే బెటర్ అనిపించింది. ఈ విధంగా చేసినందుకు మీ అందరికీ చాలా రుణపడి ఉంటాను అని ఒక సూసైడ్ లెటర్ కూడా రాసిపెడదామనుకున్నా’’ అని చలపతిరావు తన ఆవేదనను వ్యక్తం చేశారు. ఇన్నాళ్లూ నిప్పులా బతికానని, ఈ సోషల్ మీడియా అనే దరిద్రం వచ్చి తనకున్న మంచి పేరును చెడగొట్టందని చలపతిరావు అన్నారు. ఈ విషయంలోనే సూసైడ్ చేసుకుందామనుకున్నా తప్ప మరో కారణం లేదని వివరించారు. 17 ఏళ్లకే ప్రేమ.. 19 ఏళ్లకు పెళ్లి చలపతిరావు బందరులో పీయూసీ చదువుతోన్న సమయంలో ప్రేమలో పడ్డారట. ఇందుమతి అనే అమ్మాయి తనను ప్రేమించిందని, పెళ్లిచేసుకోమని కోరిందని చలపతిరావు చెప్పారు. 19 ఏళ్లకే ఆమెను చలపతిరావు పెళ్లిచేసుకున్నారు. బెజవాడలో నాటకాల్లో వేషాలు వేస్తూ నెట్టుకొచ్చిన చలపతిరావు ఆ తరవాత మకాం మద్రాసుకు మార్చారు. ఎన్టీఆర్ సాయంతో సినిమాల్లోకి అడుగుపెట్టారు. చలపతిరావు తొలి సినిమా ‘కథానాయకుడు’. ఎన్టీఆర్ హీరో. ఇక అక్కడి నుంచి రకరకాల పాత్రలు చేసుకుంటూ వచ్చారు చలపతిరావు. 1500కు పైగా చిత్రాలు చేశారు. ఎన్టీఆర్ మళ్లీ పెళ్లిచేసుకోమన్నారు.. తన భార్య అనారోగ్యంతో చనిపోయిన తరవాత తాను మళ్లీ పెళ్లిచేసుకోలేదని, ముగ్గురు పిల్లల్ని ఏ కష్టం రాకుండా పెంచానని చలపతిరావు అన్నారు. భార్య చనిపోయిన తరవాత తనను ఎన్టీఆర్, ఆయన భార్య తారకమ్మ మళ్లీ పెళ్లిచేసుకోమని సూచించారని వెల్లడించారు. అయినప్పటికీ వచ్చే భార్య తన ముగ్గురు పిల్లల్ని చూస్తుందో లేదో అని భయపడి పెళ్లిచేసుకోలేదని అన్నారు. తానే వాళ్లకు అమ్మనై పెంచానన్నారు. పిల్లలు కూడా బాగా చదివి తన పేరు నిలబెట్టారని పొంగిపోయారు. ప్రస్తుతం ఇద్దరు ఆడపిల్లలు అమెరికాలో సెటిలయ్యారని చెప్పారు. ఇక కొడుకు రవిబాబు గురించి అందరికీ తెలిసిందే.
from Telugu Movie News | Movie News in Telugu | Movie Gossips in Telugu https://ift.tt/2I7CEFy
v
No comments:
Post a Comment