‘దాన వీర శూర కర్ణ’ సినిమాను మళ్లీ తీయలేం: ‘కురుక్షేత్రం’ నిర్మాత

మహాభారత కావ్యం ఆధారంగా ఇప్పటి వరకు చాలా సినిమాలే వచ్చాయి. ‘భీష్మ’, ‘కురుక్షేత్రం’, ‘దాన వీర శూర కర్ణ’ సినిమాలు ప్రధాన ఉదాహరణలు. ముఖ్యంగా విశ్వవిఖ్యాత నటసార్వభౌమ నందమూరి తారక రామారావు త్రిపాత్రాభినయం చేసిన ‘దాన వీర శూర కర్ణ’ ఎప్పటికీ ఆణిముత్యమే. పాండవ కౌరవ యుద్ధాన్ని ఆధారంగా చేసుకుని ఈ మధ్యకాలంలో సినిమా రాలేదు. అందుకే, ఆ మహాకావ్యాన్ని మరోసారి దేశ ప్రజలకు వెండితెరపై చూపించడానికి ‘కురుక్షేత్రం’ ప్రతిష్టాత్మకంగా తెరకెక్కిస్తున్నారు. కన్నడలో నిర్మితమవుతోన్న ఈ చిత్రం మరో నాలుగు భాషల్లోకి అనువాదమవుతోంది. వాటిలో తెలుగు కూడా ఉంది. ఈ చిత్రంలో యాక్షన్ కింగ్ అర్జున్ క‌ర్ణుడుగా.. కన్నడ స్టార్ హీరో ద‌ర్శన్ దుర్యోధ‌నుడిగా నటిస్తున్నారు. ఇక సోనూసూద్ అర్జునుడిగా, అభిమ‌న్యుడిగా నిఖిల్‌ గౌడ, కృష్ణుడిగా ర‌విచంద్రన్ న‌టించ‌గా.. ద్రౌప‌ది పాత్రను స్నేహ పోషించారు. ప్రపంచ సినీ చరిత్రలో 3డి వర్షన్‌లో వస్తోన్న తొలి మైథలాజికల్ మూవీ ఇది. తెలుగు, క‌న్నడ బాష‌ల్లో ఎన్నో చిత్రాలు నిర్మించి నిర్మాత రాక్‌లైన్‌ వెంక‌టేష్‌ ఈ చిత్రాన్ని స‌మ‌ర్పిస్తున్నారు. వృష‌భాద్రి ప్రొడ‌క్షన్స్ ప‌తాకంపై ప్రముఖ కన్నడ నిర్మాత మునిర‌త్న (ఎంఎల్ఎ) ఈ చిత్రాన్ని నిర్మించడమే కాకుండా కథను కూడా అందించారు. నాగ‌న్న ద‌ర్శక‌త్వంలో రూపొందిన ఈ చిత్రం ట్రైల‌ర్, ఆడియో లాంచ్‌ బుధ‌వారం హైదరాబాద్‌లో జరిగింది. నిర్మాత‌లు బీవీఎస్ఎన్ ప్రసాద్‌, బ‌న్నీ వాసుల చేతుల మీదుగా ట్రైలర్, ఆడియోను విడుదల చేయించారు. ఈ సందర్భంగా బీవీఎస్ఎన్ ప్రసాద్ మాట్లాడుతూ.. ‘‘నేను ఎప్పటి నుంచో భార‌తాన్ని 3డిలో చేయాల‌నుకున్నాను. కానీ కుదరలేదు. నేను అనుకున్నట్లే 3డిలో మొట్టమొద‌టిసారి దేశ వ్యాప్తంగా ఈ ‘కురుక్షేత్రం’ విడుద‌ల చేయ‌డం ఆనందంగా ఉంది. టీం అంద‌రికీ నా కృత‌జ్ఞత‌లు’’ అని అన్నారు. బ‌న్నీ వాసు మాట్లాడుతూ.. ‘‘ఈ క‌థ‌ని 3డిలో తీసి ప్రేక్షకుల‌కు అందించాల‌నే ఆలోచ‌న‌ రాక్‌లైన్ వెంక‌టేష్, నిర్మాత మునిరత్న గారికి రావ‌టం.. వారు ఆ ప్రయ‌త్నా్ని ఏమాత్రం ఆల‌స్యం చేయ‌కుండా ఇంత భారీ ప్రాజెక్ట్‌ని తెర‌కెక్కించడం చాలా ఆనందంగా ఉంది. ముందుగా వారికి నా కృత‌జ్ఞత‌లు. ఎందుకంటే రామాయ‌ణం, భార‌తం లాంటివి ప్రస్తుత జ‌న‌రేష‌న్‌కి తెలియ‌వు. ఎవెంజ‌ర్స్‌, హ‌ల్క్ వంటి క్యారెక్టర్స్ త‌ప్ప మ‌న భార‌తంలో కూడా హ‌ల్క్ లాంటి బ‌ల‌మైన‌వాళ్ళు ఉన్నార‌ని ప్రస్తుతం జ‌న‌రేష‌న్‌కి తెలియ‌దు. నేను నా పిల్లల‌ను త‌ప్పకుండా ఈ సినిమాను చూపిస్తాను. ఇంత మంచి చిత్రాన్ని అందిస్తున్న మునిర‌త్న గారికి నా కృత‌జ్ఞత‌లు. ఈ సినిమాలో న‌టించిన అర్జున్, ద‌ర్శన్, సోనూసూద్‌కు నా ప్రత్యేక ధన్యవాదాలు’’ అని అన్నారు. ప్రొడ్యూస‌ర్ మునిర‌త్న మాట్లాడుతూ.. ‘‘ఈ సినిమాని కొంత మంది ‘దాన‌ వీర‌ శూర‌ క‌ర్ణ’ చిత్రంతో పోలుస్తున్నారు. ‘దాన‌ వీర‌ శూర‌ క‌ర్ణ’ లాంటి చిత్రం ఒకసారే వస్తుంది. అలాంటి సినిమాలు మళ్లీ మళ్లీ రావు. ‘బాహుబలి’ లాంటి చిత్రాలు చేయ‌వ‌చ్చు. ఎవ‌రు ఏం చేసినా అది మ‌న ఆడియ‌న్స్‌ని ఎంట‌ర్‌టైన్ చేయ‌టం కోసమే. కానీ, ఈ చిత్రం వినోదం కోసమే కాదు.. ఈ తరానికి మ‌హాభార‌తాన్ని తెలియ‌జేయ‌టం కోసం. క‌న్నడ సినిమా ఇండ‌స్ట్రీ చాలా చిన్నది. అలాంటి పరిశ్రమ నుంచి ప్రపంచ‌ వ్యాప్తంగా ఈ చిత్రాన్ని విడుద‌ల చేస్తున్నందుకు చాలా ఆనందంగా ఉంది’’ అని అన్నారు. రచయిత వెన్నెల‌కంటి మాట్లాడుతూ.. ‘‘తింటే గారెలే తినాలి.. చూస్తే భార‌తం చూడాలి అన్న నానుడి ఉండ‌నే ఉంది. ఈ సినిమాకి హీరో మునిర‌త్న గారే. ఇంత మంచి చిత్రానికి నాకు మాట‌లు, పాట‌లు రాసే అవ‌కాశం క‌ల్పించిన‌ నాగ‌న్న గారికి, ప్రొడ్యూస‌ర్‌ గారికి నా ప్రత్యేక కృత‌జ్ఞత‌లు’’ అని అన్నారు. కాగా, ఈ చిత్రానికి హ‌రికృష్ణ సంగీతం అందించారు. ‘కురుక్షేత్రం’లో పాత్రలు, వాటిని పోషించిన నటులు దుర్యోధనుడు - దర్శన్ కృష్ణుడు - వి.రవిచంద్రన్ భీష్మ - అంబరీశ్ కర్ణుడు - అర్జున్ దృతరాష్ట్రుడు - శ్రీనాథ్ ద్రోణాచార్యుడు - శ్రీనివాసమూర్తి ధర్మరాజు - శశికుమార్ భీముడు - డానిష్ అక్తర్ సైఫీ అర్జునుడు - సోనూసూద్ ద్రౌపది - స్నేహ అభిమన్యుడు - నిఖిల్ గౌడ శకుని - రవిశంకర్

from Telugu Movie News | Movie News in Telugu | Movie Gossips in Telugu https://ift.tt/2K1pj1D
v