‘జోక్యం’ ఏంటి?.. ప్రశ్న అడిగే పద్ధతి ఇది కాదు: జర్నలిస్టుపై జీవిత ఫైర్

హీరో రాజశేఖర్ భార్య, ఒకప్పటి నటి, నిర్మాత జీవిత ఏ విషయాన్ని అయినా చాలా సూటిగా కుండ బద్ధలు కొట్టినట్టు చెబుతుంటారు. ఆమె ఎంత బాగా మాట్లాడతారో కొత్తగా చెప్పాల్సిన అవసరంలేదు. తనపై విమర్శలు చేసినవాళ్లపై కూడా ఎదురుదాడి చేయడంలో జీవిత దిట్ట అనే విషయం అందరికీ తెలిసిందే. అయితే, తాజాగా ఆమె ఆగ్రహానికి ఒక సినిమా జర్నలిస్టు బలయ్యాడు. వాస్తవానికి ప్రెస్ మీట్లలో కొంత మంది జర్నలిస్టులు అడిగే ప్రశ్నలు కాస్త ఇబ్బందిగా, కఠువుగా ఉంటాయి. ఇలాంటి ప్రశ్నే ఒకటి జీవితను ఇబ్బంది పెట్టింది. దీంతో ఆమె సహనాన్ని కోల్పోయాడు. తనదైన శైలిలో క్లాస్ పీకారు. గత శుక్రవారం విడుదలైన ‘కల్కి’ సినిమా ప్రేక్షకాదరణ పొందింది. సినిమా చాలా బాగుందంటూ ప్రేక్షకులు కితాబిస్తున్నారు. సినిమా విజయం సాధించడంతో మంగళవారం హైదరాబాద్‌లో జీవిత, రాజశేఖర్ మీడియా సమావేశం నిర్వహించారు. ఈ ప్రెస్ మీట్‌లో ఒక జర్నలిస్టు.. ‘మీరు ‘కల్కి’ సినిమా డైరెక్షన్ డిపార్ట్‌మెంట్‌లో జోక్యం చేసుకున్నారటగా?’ అని ప్రశ్నించారు. ఆయన అలా సూటిగా ప్రశ్నించడంతో జీవిత నొచ్చుకున్నారు. వెంటనే మీడియాకు క్లాస్ తీసుకున్నారు. ‘ముందుగా మీడియా వారిని నేనో ప్రశ్న అడగాలనుకుంటున్నాను. ‘కల్కి’ సినిమాకు అయిన ఖర్చు దాదాపు రూ.20 కోట్ల పైనే. అలాంటప్పుడు సినిమాను నిర్మించే బాధ్యతలు తీసుకునేవారికి తెరకెక్కించిన విధానం నచ్చాలా లేదా?. ముందు మా బృందంలో ఉన్న పది మందికి నచ్చితేనే కదా మరో పది కోట్ల మందికి నచ్చుతుంది? నేనేమీ తెలీనిదాన్ని కాను. ఇండస్ట్రీలో 30 ఏళ్లుగా కొనసాగుతున్నాం. ఎవ్వరికీ భయపడాల్సిన అవసరం మాకు లేదు. నేను తీసిన సినిమాలు ఆడినా ఆడకపోయినా నాకు దర్శకత్వంపై పట్టు ఉన్న సంగతి వాస్తవం. నాకున్న అనుభవంలో ఎలాంటి తప్పులు ఉండవు’ అని జీవిత కాస్త ఘాటుగానే స్పందించారు. సినిమా తనదైనప్పుడు తాను దాని గురించి ఎందుకు పట్టించుకోకూడదని ప్రశ్నించారు. అసలు ఇలాంటి ప్రశ్నలు ఎందుకు అడుగుతారని అసహనం వ్యక్తం చేశారు. ఒకవేళ ఇలాంటి ప్రశ్నలు అడగాలనుకున్నప్పుడు.. ‘మీరు దర్శకత్వం పరంగా జాగ్రత్తలేమైనా తీసుకున్నారా? దర్శకుడికి ఏమైనా సలహాలు ఇచ్చారా?’ అని అడగాలన్నారు. అలా కాకుండా ‘ఎందుకు జోక్యం చేసుకున్నారు?’ అని అడగడం సబబు కాదని సూచించారు. జర్నలిస్టులతో గొడవ పడటం కోసం ఇలా మాట్లాడటం లేదని, ఇలాంటి ప్రశ్నలు బాధ కలిస్తుంటాయని చెప్పడమే తన ఉద్దేశమని జీవిత వెల్లడించారు.

from Telugu Movie News | Movie News in Telugu | Movie Gossips in Telugu https://ift.tt/2JiC6MS
v